September ni 7, 2011 a kingah Karen thuthang ah, Japan gam a Kawlgammi kipawlna lian " Leaque for Demcracy in Burma- LDB- Japan" in mipi anglum hong zuan kik DKBA pawlte panlakna, ka thukim pih uh ci in pulakna lai khahkhia uh hi.
Tua lai ah zuau thu tawh kigelh 2008 pingpei constitution pomlo a, 2010 Novemver 7 kiteelni a kipan mipi lam zuankik a USDP regime dokik DKBA Karen galkapte pen, mipi vaihawmna le belpawlgam piang nanga aem kipawlna dangte tawh liangko kikim in ka ngaihsun uh a tha kapia uh hi, ci in kigelh hi.
LDB laisuah tawh kisai in DKBA palai Major San Aung in " LDB laisuah tawh kisai in kalung uh dam mahmah a, tha zong ngah tuam mahmah ung, DKBA in mipi ka khem ngeikei uh a, mailam ah zong kakhem kei ding uh hi, lungkialo in gal zawh dong ka zom suak ding uh a, DKBA kip semsem nangin zong, pan kalak beh toto lai ding uh hi " ci in pulak hi.
Tua banah KNU phualpi i Policy le Programme kikhung omsa bangbang in ka gamtang ding uh a, mualgam galkap dangte leh simmawh bawlsiatna thuak tangpitangta tawh USDP migilote ka do khawm ding uh hi, ci in Major San Aung in genbeh hi.
2010 August kha sungin DKBA pen Kawlmang in, gam-nawl-cing BGF pyithusit dingin thupia a Pu Mukmul ( Saw La Pwe) makaih Tactical Command 5 pawl utlo in DKBA min tawh dingsuak uh ahihi. 2011 ciangin DKBA phualpi lui Myaingyinguu a Col. Saw Bik makaih BGF battalion 4 in zong BGF badge pai uh a, DKBA badge suangkik in USDP regime dokik uh hi.
Nungkha August beikuan in DKBA pen Sim le Mal Galma ( Tactical Command) ci in galma nih in khen uh a, Mal Galma pen Brigadier Saw Bik in makaih a, Myawaddy pan Pa-ann le Hlaingbwe township tan huam ahihi. Sim Galma pen Pu Kyaw Thet in makaih a Myawady simlam pan Kawkareih le Phayar Thoneso tan huam ci hi.
Tutunga support puang LDB pawl pen, USDP migilo kumpi khutsung pan a mipite suahtakna ngah nang a deih, pawl tuamtuam kikhaikhawmna lawmpi khat ahihi. LDB in Kalaymyo Declaration zong November 21, 2010 in supportna lai suahkhin ahihi.
No comments:
Post a Comment