Tuni S.H.A.N thuthang pan kizakna ah Shan Herald Agency for News- S.H.A.N i assistant editor Pu Seng Kyi in September 15 ni zingsang in, sin natna tawh Chiangmai khawpi ah hong nusia ci in kiza hi.
Pu Seng Kyi pen Shangam Tangyang a piang hi in, music le lai lam ah kiva mahmah khat kici hi. Lai tampi gelh in, la zong tampi phuak hi, tua ban ah Sai Kham Leik tawh zong lawmta khat hi, ci in S.H.A.N editor Pu Khun Seng in pulak hi.
" Shan minam sungah mipi it diak lasa le laphuak siam khat hi, tua bek hilo in Shan News i nasep 40 % pen ama sep ahihmanin, supna lianpi hi" ci in Pu Khun Seng in gen zom hi.
Pu Seng Kyi in class 10 azawh ciangin Shan State Army ah lut pah in, Inforamation and Publicity Department ah nasem kipan hi. SSA le SURA in a suahkhiat " Independence Journal" ah zong 1983 pan 2010 November tan endikpu sem ahihi.
Pu Seng Kyi in Shan gam sung a om minam tuamtuam te tawh kisai atawntung in laigelh den a, Shan gam tawh kisai gamdang media te'n a dot zel khat uh zong ahihi.
Asih madeuh in Wa State pai in Wa minamte thu kancianna ( Research) bawl hi, ci in SHAN ah kigelh hi.
No comments:
Post a Comment