M.A 427 si, 1000 val liam ci

September 29, 2011 ni ciang kizakna  ah Shanland a gamtang KIA Brigade.4 in Operation Storm a kuan  Myanmar Army 427 kaplum in, 1000 kiim kapliam hi, ci in Myanmar Defence Ministry nuai a leigalkap mang office ( KaKa- Kyi) report ah kigelh ci in, Defence Ministry naihuai pan kiza , ci in The Power of Fraternity ah kigelh hi.

Thuthang kizakbehna ah KIA Brigade No. 4 in, Ceasefire sung a tawldamnate uh nusia in, Shan State mallam bup ah dothuk ( Counter Offensive) pan  ziahziah ta ci in kiza hi. September 29 ni a Kachin News report ah Shan State sung Mantong Township sung a KIA Bn .No.8 le Myanmar Army ni 6 sung kikapna ah M.A 150 val si  ci in amukhate tungtawn in kiza , ci in  KNG ah kigelh hi. Asi atamzaw pen Meihthila Uibu siksan LID.99 pan atamzaw ci'n porter suakta te'n gen  hi.

Shan State a Operation Storm pen Northeast Command nuai a galkapte leh  LID.88 le 99 in silah lua ahihman in,  Yua Thaung uibu siksan LID.33 zong kuanbeh ci in kiza hi. Kachin te'n zong September kha tawplam in Brigade 4 nuai ah Battalion 2 phuanbeh in Bn.36 le 38 ci in minvawh uh cih kiza hi. Tua Bn. thak 2 kiphuat ni mah in Mongko Township sung ah kikap pah uh a, M.A 9 si ci in kiza hi. Mongko Town USDP teng zong gal hong nasiat leh China ah bukkhuan pia dingin, ngen uh a, China in zong phalna pia khol ci hi.

Kachin State lam ah zong KIA Heaquaters Special Brigade in Myanmar Army te KIA Headquaters atun ma dalkholhna in  va kapkhol ci in kiza hi.

September 29 ni mah in Kachin Pyituhsit ( MHH) te'n Sinbo Town kiang ah,  Irrawaddy gun zui a kuan Myanmar Army vokkuang khat tuiphum uh ci  hi. Tua banah Waingmaw Township sung ah KIA in Military Affairs Security- M.A.S ( Nidanga MI dante) khat September 30 nitak dak 3 pawl in kaplum, ci in kiza hi. 

Mipi lampang Myanmar Army lui le a semlai khenkhatte bawl The Power of Fraternity Blog in M.A sunga officer tampi le a innkuan pihte un alungkimlohna te uh, internet ah khahkhiat theih nang hanciam uh ci in kigelh hi.

September 26, 2011 kiim in Myanmar Army a Da-Ka-Sa le Sa-Ka-Kha tungsiah teng, Nei Pi Taw khawpi ah khawmpi nei uh a, khawmpi zawh ciangin mualgam teng leh kawlgam ukzawh nang ci in Kawl-Lukhu Pi khat Tat-Tung khusak uh , ci in kiza hi.

Irrawaddy Dam, Arakan Gas Pipeline le Kachin suang-eng teng KIA le mipi te'n ki hum zo hi leh, Myanmar Army giautau mahmah ding hihtuak hi.