Independent Mon News Agency- IMNA report ah Meitei Guun khaktanna pen sum hamsatna hangin ze-ol hi, ci in Deputy Minister Khin Zaw in gen ci in kigelh hi.
2004 kum a kipan ahihangin Design kigelh zo pan a, 2011 sungin construction 13.53% bek kizo zo ding hi, ci'n Pingpei Parliament a USDP Mut Pu- MP Tin Hlaing dotna Minister Khin Zaw in dawngkik ahihi.
2004 Than Shwe pailai in Manipur Dam in tuilo acres 100,000 val tuipia zo ding a , Electric Mega Watt 540 piang ding hi, ci in Penglam Newspaper te'n gelh khengkhang ngei uh kici hi.
Tutung in bel a sum khiam nuam uh hileh kilawm in, a project zong kikhiam hihtuak hi. Penglam minister Khin Zaw dawnkikna ah tuilo acres 50,000 le Electric mei Mega Watt 380 hi, ci in alangval kikhiam in gen themthum zel ahihi.
Tahan a teng Zomi upa khat in " Kawlmang thu akpi in phiatnelh cih dan hilo dia, hi thei leh hong sem dah le uh hoih in teh, hong sem taktak le uh, a sum teng guk nek gai ding un, sum themcik tawh hong zawh sawm ding uh a, tua Dam pen lauhuai mahmah ding hi, ziin bang ling leh Kawlpi Zaang bup Baptise sa kihi mawk in, khawl tuanlo a hong lam taktak uh lebel , Khamtung lam ah pem kik kholh ding hoh a ngaihsun phial hi ing " ci hi.
Thuthang kaihkhawm tuamtuam na ah , Myanmar Army bawl lampi, dam le building himhim guta thei lua uh ahihmanin, sawt kizang thei khat zong omlo a, alampi ziikte bang uh kum khat zong ahoih zo tammel lo kici hi.
Tua ahihmanin KIA le mipi te'n Irrawaddy Dam zong lau mahmah uh a, sisan naisan le khaw-ul thatang tawh dodal uh ahihi.
Chin Dwin guun tungtang zong Thado Zomi kipawlna khat ahi Kuki Students Democratic Front- KSDF in leitung Rivers Network leh Burma Rivers network tawh kithuah a, nakpi tak a pan alak san laitak uh ahihi.
Zozaang bup hong ki baptise ma in, Meitei gun le Kalardan gunte tungtang zong, GZA le Siamsin te bangin pan hong la leh uh uthuai si ee, aci bang tam simsim kiza hi.
No comments:
Post a Comment