Panglong Gal Report

Kayah State

Kayah State sung Phruso Township Panchun Camp  siksan Myanmar Army le Karenni Army te October 11,2011 ni in kikapna omin alang nih in asi le liam om ci in kiza hi.

October 11, 2011 zingsang 5:20 in Karenni Army in  Myanmar Army  Panchun Camp va bukap hi, ci in Karenni Army Chief-of-Staff General Be Htoo in gen hi.

Tua kikapna ah Myanmar Army LIB.337 pan Lt. Htet Nyi Nyi Win le lubok Kaung Tin Htet liam in, Surgeant Major Maung Ni si ci hi. Karenni Army lam pan Lt. Maw Phu si in Lance Coporal ( Sankhat) khat liam ci in kiza hi.

" Kikapna bel a omom mah kullai hi, Politics kikhel masiah pen ut in ut ta keileng kikapkul hi" ci in Information Secretary Pu Danial in  gen ahihi.

October 9 ni in zong Phruso township sungmah ah  KA le MA LB.250 kikap khin ci in kiza hi.





Kachin State

October 12 ni in nai 24 sung vingveng kikap khit ciang KIA in MA te i Jan Mai Camp lazo uh ci in kiza hi.

Kachin State sung Loije Township sunga mualdawn khat a om Janmai Camp pen KIA Brigade No.3 nuai a Bn.No.16, 21 le Kachin mipi kipawl in buluhkhia uh ci hi.

Ni khat bup kikapna ah KIA 2 si in 9 liam ci hi. Senglung khua ah KIA 2 sihbeh hi, ci in KIA officer lam in gen hi.

October 14 ni in zong  Myitkyina-Bamaw lampi tunga om,  Lung Zep Kawng mualdung ah KIA le MA nakpi in kikapna om a, Myanmar Colonial Army lam aliam motor 4 dim pha in Waimaw lam ah puakhia uh ci hi. M.A truck 2 KIA in kap palh in KIA lam asi le liam omlo ci hi.

Hibang kawmkal ah Kachin Development Network Group- KDNG in agenna ah Irrawaddy Dam pen akhawl taktak uh hilo hi, ci in gen hi. KDNG spokeperson Aa Nang in agenna ah " Dam bawlna dinga kizang van le nasemte nidang bangmah in omlai a, No.7 Dam mun ah zong lei tehteh lai uh hi." ci in gen hi.Aa nang genbehna ah " CPI Company mahmah in ka khawl taktak ta uh hi, acih masuah uh ka um kei uh hi" ci in gen hi.

Irrawaddy Hydel Project pen 2005 kum a Myanmar Army le China kithukim sa uh hi in, Dam 7 pan khawphelep mei Mega Watt 13350 piang in American Dollar Billions 20 bei ding ci ahihi.( Mega Watt khat ah Kilo Watt 1000 om hi, Zalui Hydel pen Mega Watt 1/2  zong phalo ahihi.)





Mon State


October 6, 2011 ni in New Mon State Party-NMSP le USDP regime te Ye Township ah kiho uh ci in kiza hi.
NMSP General Secretary Nai Hongsa in agenna ah " Ko party le Mon minam a ding bangmah aituam ngetna ka neikei uh a, Non Burman Alliance pi ahi UNFC min bek tawh politics gen ding ut ung, cih  Myanmar Army va theisak bek ka hi uh hi " ci in gen hi.

Hih kihona ah Myanmar  pan Col. Tun Tun Nyi le Mon pan Lt.Col. Nai Hongsa in makaih uh  cih kiza hi.

NMSP le USDP/MA kihona pen Mon le Non Burman minam dangte kikal a "Khetphim" hong khet sawm uh ahihi, ci in Oversea Mon Cooperation Committee-OMCC Vice Chairman Nai Thiri Mon Chan in gen hi.



Shan State


Tualitak Myanmar Regime in Shan Galkapte hopih kawikawi ci in kiza hi.

Shan State mallam le alailam a nasem SSPP/SSA pawl a thupulak Major Sai Hla in " Shan makai Khun Htun Oo le Sai Nyunt Lwin khah ding in ka deih uh hi, State government tawh bel gamthu kihello (Non Political Issues) te ka kiho pih ding uh a, Tua khit ciang Pyinmanar tawh   bel Zomi, Shan, Kachin le unaudangte tawh ding khawm in UNFC min bek tawh ka kiho nuam uh hi"  ci in October 13, 2011 ni in gen hi.

Mongla siksan NDAA kici Shan/Akha pawl tawh kihona ah bel, NDAA in Myanmar ukna nuai pan paikhia a Independence apuang kei nak uh leh, a utut uh sem theina khuan, Myanmar Army in pia cih kiza hi.

UWSA atawh October 01, 2011 ni in Lashio ah kiho uh a,

1. Wagam le Myanmar ah palai koih tuak ding.
2. Wagam ah UNO le INGO tuamtuam om khuan le lutkhuan pia ding.
3. Myanmar le Wagam in Drug dokhawm ding.
4. China-Wagam kizopna pen Myanmar in kham nawnlo a, suakta tak a kizop khuan om ding.
5.Tua banhah Mong Yawng Township sunga leisung sumpiang teng tawh khuan UWSA pia ding.

Cih teng ahihi. tua ban ah,

a. UWSA galkapte nek ding khakhat in antang ip 2000 le sum awn 10 ta Myanmar in pia ding.
b.Wa galkap le Kawl galkap kikaplo a kilem tak a om ciat ding ( 1989 kithukimna bangbang in)
c.Wa galkapte zuun nang Dolsing ton 10,000 le singkhauh tuamtuam ton 10000 piak ding.
d. Non Burman gam le minam dang Myanmar Army abuluh niloh uh khawl ding.

Cih thute zong behlap uh ci in kiza hi. Hih kithukimnate pen October 8, 2011 ni in, Wa Government( 2010 kiteelna Wagam ah omlo in, Wa te'n amau le amau gov. bawl uh hi) in Wa galkap le mipi kiangah hilhcianna pia ci in zong kizak beh hi.



Rakhine State


October 12. 2011 ni a kikhah Prisoner of Conscience te lak ah Rakhine 7 bek kihel ci in kiza hi.

Tulaitak Rakhine( Arakan) State bup ah Rakhine te neihsa Natural Gas teng Kawl te'n pipeline tawh China ah azuaksawm uh lungkimlo in, Rakhine gambup lai kihawm keei kici hi. Adiakin Gas pianna Kyaukpyu township sungah nasia mahmah ci hi.

Tua movement pen October 12 ni a kipan hi in " Rakhine gambup  nai 24 bit  electric mei ngah nang" ci in kiminvawh hi. Poster kisuang kawikawi in tua poster te ah " Ko natural gas  ko zatkhuan  nei ung, nai 24 sung khawphelep mei,  tu mahmah in hong pia un" ci in kigelh ci hi.

Nungdeuh a Pingpei Parliament ah Energy Minister Than Htay in Rakhine tuipi pan a piang, Natural Gas teng Rakhine state a ding kizang lo ding ci a, a genkhiat a kipan Rakhine mipi  lungkimlo uh kici hi.

Tulai tak Arakan galkapte le Non Burman gamte kipawl a Myanmar gamkeekte akapsan lai tak uh ahihi.





Zogam 


October 12 ni kizakna ah DKBA, KNU, ABSDF le  Zomi Independence Army kithuah le Myanmar Army kikal ah  nisim phial in kikapna om den a,  khat veivei ni khat in 3 vei bang kikapna om ci in kiza hi. ZIA te'n zong galvan tawi ding neita ci in kiza hi.

Tutunga kikhah jailkia te lak ah ZNC lam khat le CNA lui khat suakta ci hi.

October 13, 2011 ni thudang kizakna ah Zomi Baptist Convention-ZBC palai te'n, Kawl gamkeekte simna thuak Kachin mipi te, thuakhawmpihna le vehna nei ding ci in kiza hi.