Tulai Zomi pansan ding bang hiam?

Tulai Kawl Hausa gam enleng 2010 kiteelna tungtawn a vaihawmna len USDP Thein Sein Hausa pawl in kikhelna tampi  bawl uh tawh kibang ahihi. Tuabang kikhelna limte hangin Zomi,  mualmi le mipi sungah zong dotna tampi piangsak ahihi.

Tua kikhelna kicite lak ah a thupite  enleng,

1. Pingpei Parliament pen hong suakta zaw deuh tawh kibang hi.

2. Pilna khaktan ahi Press and Secrutity Beauro phiat sawm uh hi.

3.Irrawaddy Dam kholkik hi.

4. Aung San Suu Kyi mimal in hopih uh hi.

5. Jail kiate khah kipan ta uh hi.

6. Political party khenkhat register thei ding ci in hong uh hi.

7. Mualgamte tawh kiho kik sawm hi.

Atunga thute enleng mi tampi lungbuai sak zo ding thute mah ahihi.

Hihmun ah Zomi le mualgamte bang dinmun ah ding ding i hiam? cih dotna lianpi hong om ahihi.

Tua dotna pen abaih pen dingin dawng leng " Upper House tawh kisai kikhelna om ding ci  in, kamciam le pulakna USDP/MA regime  te'n anei uh hiam? " cih ziau ding hilel ahihi.

Banghang hiam cih leh Panglong, Federal , Belpawlgam, Pyithaungsu, Union, Tripartite Dialoque  le National Reconciliation ci a, alawh daan tuamtuam tawh i lawh bialbual hangin, tua kammal teng i gennop bulpi in Upper House tungtang agengen hilel ahihi.

Upper House ah Minam 8 teng in palai kikiim nei a , minam liangko kikimna kideih ahihi. Tua banah Upper House le Lower House thuneihna tawikhai kikiim ding kideih ahihi.

Tangpi tangta theih dingin Upper House le Lower House  thu atomin gen dih ni. Democracy gam tampi ah parliament ( Hluttaw) pen dawl 2 a kikhen ahihi. Anuainung Lower House pen mi phazah siksan a kiteel ahihi. Atungnung Upper House pen Minam le State palaite kiteel ahihi. Gentehna ah US Innpi upper house ahi Senate pen State khat pan MP palai 2 ta kisawl ahihi. State neu le lian tawh kisai lo a, state te liangko kikimna lahna ahihi. Lower House ( House of Representative) pen US gambup pan milip tawh kitauk a kiteel khia ahihi. Lower house in thukhensatna abawl khat peuh Senate in daal thei ahihi.

Kawl Hausa nuai ah zong Upper House ahi Amyotha Hluttaw ah State tengin palai akikim a sawl ding ahihi. Kawlte zong state khat a hong ding ding uh a, Chin State le Kawl State palai neih zah kikim ding cihna ahihi. State 8 kipha henla palai 10 tek nei hileng upper house ah palai 80 pha in kawlte 10 khat bek pha ding cihna ahihi.

Lower House ( Pyituh Hluttaw) bel miphazah (population) tawh paiding ahihmanin, Kawlte atamzawk tham ding mah ahihi.

Kawl tamzawkna Lower House in Buddhist suakgai ni, Christian phiatni, zanggam bek puah ni, mualgamte neihsa teng teepkang ni, cih bangin in suakta takin thu khen thei uh ahihi.  Ahizongin Upper House ah mualgam tamzaw ahihmanin tua in nadaal thei ahihi.

Tua pen Equality ci a kum 60 valsung i ngetnget pen ahihi.

Tulai a Kawl Hausa Thein Sein in kikhelna bawlna ah tua equality tawh kisai khat zong kimukha nailo ahihi. Mukhalo genkhalo bek thamlo in Equality deih Mualgam teng nakpi in a buluh laitak ahihi. Equality ngen Mualgam teng abuluh kawmkal ah Kawl mipi Aung San Suu Kyi nangawn  zawn beh in, ASSK in zong mualgamte asuaksuak uh suak hen aci bangin, Thein Sein tawh uitui hawp khawmkhawm uh ahihi.

Tulai tak a reform bawlte enleng Mualgamte Rights teng abuluhna vua nongkai loh nang  Kawl mipite zawtna peuh  a, thupi lualo civil rights khenkhat piakhiakhia pak lel tawh kibang ahihi.

Kikhelna taktak bawl nuam uh ahih  leh Upper House puahphat ding tawh kisai lampi hongta uh hiam? honglo uh hiam cih pen Zomi le mualmi ta dingin a tehna piidan (scale/meter) ahihi.

Division teng phiat a Myanmar State or Burma State a ding ding, tua state in Upper House ah Chin State tawh palai kikim aneih ding kisam hi.

Tuabang a utkei uh lebel Zomi le Mualgam te'n liangko kikimna i ngah nang i do lai kul ding cihna ahihi.Liangko kikimna a ut mahmah kei uh le lah, lampi tuam sat ding hilel ahihi. Anuakte zong i nuaklai mah kul ding ahihi. Mualgam le mualmi tawh kisai Kawl Thein Sein le Kawl Su Kyi in eite awlmawh zah a awlmawh lua khollo ding uh ahihmanin, pilvang le ciim mahmah ding hun ahihi.