Zogam khutdawh ngen kipanta

Chin State sum zat ding kicing thei mahmahlo ahihmanin, Pyinmanar Kawlmang kiangah Awn 25 ngen ding ci in, Chin State Assembly in Tuesday ni in khensat ci in kiza hi.

" Chin" pen "Taung" na hizaw mawk veh ee? ci in Pyinmanar Kawlmang in hong nuhnau malam uh a, Awn 25 bek kingen ngam hi, A kisam taktak Budget Deficit bel Awn 6000 tak hi" ci in CPP palai Kyaw Nyein, State Forest and Mining Minister ( Annsing leh Cikhuuk Vuangyi) in gen hi.

Chin State kumkhat Budget zah pen mipi theih dingin, Kawlmang le State limneu kumpi in puangkhialo hi. Ahihangin Budget Deficit taktak pen Awn 6000 ( Billion 6/ Crore 600) pha ci in kiza hi.

2008 Constitution ah State teng i kum khat sung sum zat ding budget pen, President Thein Sein in State Chief Minister teng tawh kikum a bikhiah ding ci in kigelh hi.

Tua ahihmanin Chin State Budget pen Thein Sein le Hung Ngai in adeihdeih vua agelh uh cih ding ahihi.

Union pumpi sumzat ding pen President pawlin asuaih ding uh hi a, tua khit ciangin Parliament( Hluttaw) phalna nget ding ahihi. Upper House ( Amyothar Hluttaw) leh Lower House ( Pyituh Hluttaw) in athukim bek cianga, kikipsak thei ahihi. Upper House leh Lower House akithum theih kei uh leh Union Parliament ( Pyithanugsu hluttaw) kici House 2 tut khawmna pan khensat ding ahihi.

2011 Chin State Budget pen bangzah kiseh cih akitheihloh banah, Union Government in Chin State a ding hong sehzah tawm salua leng, House 2 te pan Chin State palai te'n dalzo ngeilo ding ahihi.

Lower House pen population siksan ahihmanin, Kawlte'n adeih zahzah uh vompi sahawm in sum kipia thei uh hi. Upper House leuleu pen State/Division te thuneihna ahihmanin, Zomi te'n tua siksanin Budget hong kipia zah i lungkim kei leh kidal thei hi. Chin State thatawh i zawh kei leh mualgam teng tha tawh kipang thei ahihi.

Ahizongin 2008 Constitution ah Upper House ah mualmi atawmzaw dingin bawl uh hi. Kawlte seh 7 kisuah in Division 7 bawltawm uh a, tua banah State palai 12 lak ah 3 ta pen Kawlmangmi koih uh hi. Tua ahihmanin Upper House ah Zomi leh Mualmite atawmzaw hong suaksak uh hi.

Tua ahihmanin 2008 Constitution ahinglai sung teng, Chin State Government leh mipite pen khutdawh ngen kumpi leh mipi kisuak phot ding ahihi.

WZC le ZIA te deihna pen,

1. Upper House ah State tengin palai kikim neih ding.
2.Kawlte State khat a kigawm ding.
3.Upper House le Lower House thuneihna kikim ding.
4. Adiakin Budget Bill pen Upper House thukimna loa, khensat loh ding.

Cih teng ahihi. Tua pen Federal le Unitary Constitution kilamdangna lianpi te ahihi.

Federal Constitution tawh hileh Kawlmang kiangah khutdawhngen kullo a, Upper House launa tawh Administration pawl (Kumpi pawl) in Budget hong bikhiah pah ding uh a, tua zong i lungkim kei lai a leh, Upper House pan kikhaktan thei lai ahihi. Khutdawhngen niloh kullo, vaang nei tak a kiding linlen thei cihna ahihi.

Upper House in Union Budget khaktan bang hi leh, Administration pawlin Budget apuahthak uh kula, tua pan kithukim leh pass pan theih ahihi.

USA tawh genteh pakleng, nungdeuh a US bup kumpi nasemte khasum sang theilo a, hong omna uh pen Parliament ( US ten Congress) ah Obama Administration i puaklut US Budget akikup uh ciang Congress ah adal om ahihmana, 2011 Budget kipia theilo ahihi. Parliament a House 2 te ah limtak hong kikum khit ciang vua, Budget kiphal thei pan ahihi.

Tuamah bangin US tangthu sungah State khenkhat in amau State Budget ngahzah tawm salua in, USA pan inntuan khia ding ka hi uh, ci in Washington bang vau theizel uh ahihi.

India ah zong Gujarat State in amau state khanto nang development fund anget uh pia nuamlo ahihmanin, State Chief Minister Modi in Development Fund nong piaknop kei uh leh, India in Gujarat ah siah (tax0 zong hong dong dah un, ci ngei hi. Union siah kidong kei leh Gujarat pen India hi nawnlo cihna ahihmanin India zong patau in, nawh vaihawm mahmah uh hi.

Union khat a i kipawlna pen tua kipawlna hanga phattuamna omte i deih man ahihi. Tua ahihmanin Chin State taaksapte zong Union pan a khutdawh ngenkullo a, i ngahtheih ding i deih man a Union ah va kihel i hihi.

Tu tungtangin enleng 2008 Constitution zanga fund nget masak penna ah " Chin" kong sak uh leh "Taung (Ngen)" na himawk vevua" ci in Kawlmang in ci khin malam hi.

Tuta banga hong paipai lai a leh bel, Zomi khang sawnsawnte leh Kawlmang kikal bel, kilemna a om pak ding gamla lai mahmah cih ding ahihi.

2008 Constitution tawh Kawlmang in hong siam khiat " Begger State" pen Tuesday, November 8,2011 ni Chin State Assembly thukhensatna tawh kihong ta ahihi.