Zomi tampi kivakna Georgia Aksemh

Blog lengla khenkhat in Zomi tampite kivakna leh i phattuam pih ahi, aksa tawh kisai news le information tuamtuam zong hong gelh zel dih ve acih manun, Zomi tampite nasepna Georgia State a aksalam sumbawlna tawh kisai theihhuai tawmkhawm, online search pan zong khiatte i khahsawn hi.

Akkhawina leh Akgawhna munte pen Georgia State pumpi mun tuamtuam ah om kim phial ahihi.

Photo:GPJA

Georgia State a aksemh te apanpih Georgia Poultry Justice Alliance-GPJA in agelhna vuah, Georgia State in ni khat in aksa Awn 23 pounds  leh aktui awn 18 val suaksak zo uh ci hi.


Tua banah aksa nasem 37,000 val pha in kum khat in ak luang awn 1,000 ( Billion khat) semkhia uh ci hi.

Hih akgo 37000 teng i nasep in aksa tawh kisai nasepna  dang 55,000 piangsak in, Georgia State a ding kumkhat in USD Billion 13 (  Awn 13,000) zong khia zo uh ci hi.

Photo; GPJA

Georgia State ah Ak tawh sumbawlna akhan mahmah hangin, a nasemte phatuam nang le kimlekiang ( Environment) lam ah bel panlak ding tampi omlai hi, ci in GPJA pawlin pulak hi.


GPJA pawlin agenbehna ah Chicken Catcher kici akman pawl bang, adinmun uh lauhuai mahmah ci hi. Leivui le bacteria le microorganism kici muh theihloh lungnote a diik khak tawntung ban vuah, Akmante pen company ten fulltime nasem taktak in pomlo uh a, cialpak nasem (Intedependent Contractor) daanin ngaihsun uh a, overtime leh benefit te amau tungah cilbawl mahmah hi, ci in GPJA in pulak hi.


Akmante

Photo:GPJA

Akmante bek hiloin Aksemhte zong a dinmun uh awlmawhhuai mahmah ci hi.

1.Nasep manlang lua ( The fast pace of the work)
2. Sep khat bek semsem ( Repetetive Motion)
3. Khawvot
4. Chemical lauhuai kizangte.
5. Electrical vanzatte.

Hibangte hangin liamna leh damlohna pianga, nasep tuamtuam lak ah aksalam a nasemte in nak tuak pen uh hi, ci in GPJA in tangko hi.

Asuuk pen ah bel nasep ki bangbang niloh/ nasep khat semsem ( Repetetive Motion) hanga piang thei, pumpi leh lungsim zawmna leh natnate pen, Worker Compensation kici damloh leh liam cianga kipia hamphatna/vehna sum  Geogia ah kipia lo ci hi.

Akgawhna leh Aksemna ah Zomi tampi in zong sem i hihmanin, mihing khat nasep thaman leh hamphatna tawh kisai, ngah ding bang  ngah kei a leh GPJA pawl ah kihelin  hamsatnate pan kila khawm thei ci hi.

GPJA pawl kici pen bangzah a munbun le thahat cih bel eima ciat khensat ding hi a, alunglut te'n http://poultryjustice.weebly.com pan kivel thei ahihi.