Zomi KRRF leh Kawl FFSS

Zomi te'n Kachin Refugee Relief Fund-KRRF bawl a pan i laknate, Kawl actress minthang Kyaw Thu makaih Free Funeral Service Society in zong nungthuap in huhna kipan ta uh cih kiza hi.

FFSS in phalbi tungta ahihmanin puanlum leh puanza  khak uh a, Myitkyina leh Waimaw township sunga kibu, Kachin Refugee te sungah hawmkhia ding ka hi uh hi, phalbu hita ahihmanin galtai naupang te genthei mahmah cih kiza hi, ci in Kyaw Thu in  Mizzima  media te kiangah gen hi.

Khawvotna pen Celsius 3 nuai ah kia in, Maijayang kiim ah bang vuuk kiat banah  huih vot zong nak nung mahmah hi, ci in Kawl Newspaper te'n gelh hi.

Kyaw Thu in agenna ah gamgi tan kapai nop uh hangin kipai ngamlo hi, Myitkyina kheng leng Kawlgalkap te'n hong nawngkai sak ding hi" ci'n gen hi.

Mandalay a Bawa Alin leh 88 Generaltion Student Group te'n bel bangbang ka tuak uh zongin,gamgi a dongtuakte omna tan ah, va pai teitei in huhna ka piak sawm uh hi ci'n gen uh hi.

KIO ukna Maijayang bial ah refugee camp 6 kihonga tul tampi in beel uh ahihi. Tua lak ah naupang le puteek piteek 800 in khawvot hangin tuap natna ngah uh a gen thei mahmah uh ci in kiza hi.

Kawlmangin Kachin gam buluhna nak bawl semsem ahihmanin, kikapna nasia tektek a galtai kibehlap toto in 40000 valta ci in KIO Relief Committee in pulak hi.

Kachin Women Association of Thailand- KWAT makai Mai Ja in " Khawvot hangin naupang le uham tamzaw damlo hi, gamsungah buuk sungah om uh a, leilak ah lup kul ahihman in, bukkhuh leh khawsik vei gawp uh hi." ci in gen hi.

Thuthang kizak behna ah July,2011 a kipanin, Milimbia USDP Thein Sein Kawlmang in gamsung NGO te'n dongtuakte huh ding kham ahihmanin, NGO tampi gamtang ngamlo uh cih kiza hi.

Tua mah bangin UNO in zong Kachin Refugee te, China ah camp hong sak sawm mah ta leh, Pasian umlo Communist China kumpi utlo hi. Tua hangin UNO in zong acih nanguh theilo a gal-et mai uh ahihi.

Tua ahihmanin Kawlmang bawlsiat thuak veve lak ah, tulaitak Kachin dongtuak galtai refugee te dinmun pen dengdel penpen ahihi.

Hillary Clinton hong pai sungin Kyaw Thu leh Kachin Baptist Convention makaite tawh zong kimu uh a, tua mun ah KBC in Kawlmang bawlsiatna leh numei naupangte thuaknate Clinton kiangah nakpi in gen uh cih kiza hi.

KRRF makai khat in " Zomi mipi te'n upmawh zah sangin, unau Kachinte lainatna na nei zaw uh hi," ci in gen hi.

KRRF mah bangin Kawl FFSS in zong mailam ah tu a sangin a nasia zaw in panla lai ding ci in kiza hi.

Reference:

MIzzima

KNG

VOA

KRRF