Hillary Clinton leh KRRF panlakna

Tulai in US State Secretary Hillary Clinton pen,  kum 50 sungin a khatveina dingin, Myanmar ahawh thu thang vengvang hi.

Hih US piteknu khualzin tawh kisai in muh daan nam nih om ahihi. Khenkhat te'n 2010 kiteelna pan a kibawltawm Thein Sein kumpi pen USA in pompih ta ci'n  la uh a, Hillary Clinton hongpai ma bangin vanleng tual a dawn dingte bang Yangon a Makeup le Beuty Parlour minthangte samin, numei pasal cih bang omlo in kizem ngeingai uh ci hi. USDP vaidawn ding pawl bangin nidang a agen siatsiat uh banglo in, a dawnkha ding bang kituh keei uh hihtuak hi. Hilary kiangah sanction kici kawlgam gawtna hongkik ding nget sawm uh ahihi.

Khenkhatte muhna leuleu ah bel UN te kawlgam hong lut ding sangin, USA honglut leh mavang zaw ding  ci uh hi.Banghang hiam cih leh UN pen Cold War ki-elna bei zawh kuamah in napniit nawnlo hi, Zomi te  bangin Refugee vai cihloh akimanna thei lo hi. Zuau le khem vive tawh kum 23 sung vingveng Myanmar Army in leitung abumbum uh pen, tutunga Hillary Clinton hong hawh a kipan beita dinga lam-en pawl zong om ahihi. Banghang hiam cih leh tulai tak leitunga USA bek super power hi in, vai khempeuh ah USA lo a piang phalo ahihi. Tu'n USA in Kawlmang pen gal-et nawnlo in kimaituah a hopih, kithuahpihta ahihmanin, US kumpi in Kawlmang gam nuai ah bang thuteng piang hiam, kawlmang bang ci gamtat hiam? cih amau mit mahmah tawh encik ta ahihmanin, agal pana hong etet uh sangin hoih zaw kici hi.

Tutunga Hilary hong hawhna pen kuakua in bang teng gen tase leh,

1. Mipi, Zomi le Non Burman Minamte dinmun

2.Myanmar Army kipuahthakna vil ding.

Cih thu bulpi 2 hang ahihi.

2010 kumin kiteelna tawh kibang pian khat Myanmar Army in hong bawl zawh uh ciangin, Kawlmangin " Democracy ki ngahta ung ei "  ci in mipi le leitung ah tangko uh hi.A siksan dingun mipi kiang pan asutsak sa uh tanvo ( Rights)  themno khat piakik uh a, mipi le gam tampi bangin lamdang sa liang uh hi. Tua tawh ki zawitawn in Aung San Suu Kyi zol uh a, munno khat piaksawm uh hi. Mualgamte zong hopih kawikawi in leitung mit ah etlawm sak mahmah uh hi. 

Hibanga Myanmar Army a piangthak tawh hong kibatnate avil dinga Obama in Hillary Clinton hong sawl ahihi.

Tutunga Clinton hong hawhna pen Kawlmangte lam-et bangin pai tuaklo a, Hillary Clinton in " Gawtna Sanction pen USA in kakhiam nai kei ding uh hi, tu a sangin kikhelna nakpi a hong bawl lai uh kul ding hi" ci in gen hi.

Hillary Clinton gen Kikhelna bawllai ding acihte pen,

1. Kachin le Kawllo gamte bawlsiatna khawl ding.

2. Thudik deih hanga jail kiate khah ding.

Cih thu nih ahihi.

Tulaitak Mualgam teng ah kikapna khawl kik tase leh, Kachin gam ah kikapna nasiatak omin abeisa kha 5 pan khawl nailo a nasia tekek zawsop hi. 

Thein Sein Regime in mualgam teng tawh kilemna bawl ding acihcih uh pen kuamah in um taktak ngamlo  hi. Banghang hiam cih lehNon Burman gamteng pen khat khit khat a khil sawm hi in ki-ummawh hi. Mualgam dangte themvei kiho pih pak dingin tua kal a Kachinte nuai cimit ding , tua bang mah a adangte abanban a hih dingin , atawpna ciang Zomi, Kachin, Shan, Karen, Rakhine, Mon, Karenni teng Kawl nuai ah suk acih uh leh suk, to acih uh leh to ding a, hong koih nuam uh ahihi. 2008 Constitution pen tua dinga agelhkholh sa uh ahihi.

Political Prisoner kici thudik thuakpihte vai zong tua bang mah ahihi. 8888 piangsak leh amakai taktak pen tulai a Jail sunga om teng leh kawlgam sung pan kihawlkhia gamdang tung teng ahihi.Thein Sein in nung deuh a Bali Asean khawmpi ah " Political Prisoner om kei" ci lailai hi. Tua kammal in a lungsim tawng uh leh a keel luphum uh dawk sak mahmah hi. 

National Reconciliation ci in Kachin te kapkap, Democracy ci in thudik deihte khum cipcip lai uh ahihmanin, mi taktak te'n Thein Sein Regime pen um hetlo uh ahihi.

Mualgam teng enleng Kachin bekin tulai tak thudik gum in dingpih lai a, adang tengin gal-et laitak hi. Kachin te pen Kawlgam ah democracy hun lai pek a kipan, Christian biakna sihpih ngam a na kipan uh ahihi. Tua mah bangin tuhun laitak in zong Mualgam Tanvo dinpih hang a, Kawlmang galkapte buluhna thuak amau bek mah om ahihi.

Tulai tak WZC in Christian upna le Mualgamte rights ngah nang ahanciam hang vua, galtai leh dongtuak lawh Kachin numei naupang, piteek puteek te veh nangin KRRF phuan in nakpi a panla ahihi.

Atawpna ah i gennop bel US Secretary of State in mipi, Zomi le mualgamte deihna hong nungthuap a hihman in, a ma tungah lungdam huai ahihi. Pi Hilary i ngetna te atangtung masiah, Christian le Mualmite deihnate a ding pih tinten lai omsun,  Kachin unaute panpihna ahi KRRF nungthuap ciat dingin i kihanthawn hi.