WZC Makai Pu Thang Khawm Pau leh US Senator Pu Mitch McConnell holimna

Senator McConnell tawh kimuhna pan Dotna & Dawnna te

Aki gelhni: Tuesday, 24 January 2012
Agelh: Thang Khawm Pau
source:www.zomidaily.com

Photo Courtesy: Pu Thang Khawm Pau

ZomiDaily-01/23/2012: Tunung Saturday Jan 21,2012 ni sun nai 3 hun in, Senator McConnell tawh Kawlgam mite kimuhkhop ding thu,  kong tangkona tawh kisai in,  Senator pa pen ko kiang pan nai khat khawng kipaina munkhat ah, Refugeete tawh holim aneihna pan, ziakai kha in honglap zolo hi.

Amahtawh Kawlgam ava zin khawm ahi Mr Reb Brownell (Legislative Director and Council) tawh dotna dawnna leh holimna, nai 3 sung ka neithei uh hi.

Amasa in azinna vua amuh thuteng uh leh, Kawlgam omzia anuai a bang in ong genkhia hi.

 1. Senator Mc Connell pen kawlgam vai tawh kisai, thukhun tuamtuamte leh malakna tuamtuam, asep zawh kum 20 bang hita in, tutung khualzinna tawh kisai  siangtho tak leh kiciantakin vaite sem thei kisa in, ahoih ding muanna McConnell in nei ahihman in, palai ( Ambassador) puak dingin kikhentat hi ci hi.

 2. Senator pa tawh keitawh officer honkhat kavapai uh-a, Kawl Kumpi  lampan, Mualtungmi makai pawlkhat leh Suu Kyi tawh kakimu uhhi. Suu kyi in thu nih ong vaikhak a, gampualam a om kamite tung ah ong thapiakna te uh leh, ong huhnate uh hang in lungdam nacihsak inla, tun zong mualtungmite taang palai dingin, keimahmah kiteelna ah luutding kahihman in, mee ongpia uhhen nacihsak in ong ci hi.

 3. Tuaban ah Suu Kyi in zong, mualtungmite tawhkisai aveina leh, tuate tawh kisai in kiciantak in policy aneihlam ong pulaak in, thangah huai thei mahmah cihzong onggen hi.

 4. Kumpilam pan kakimuhna uh ahzongin,  ipsim omlo in thongkiate tawh kisai ahizong in, thautawi mualtungmite tawh ahizong in, leh ,  party tuamtuamte tawh maa alaak ziate thangahuai mahmahban ah, ka omsung nangawn un zong, khahkhia ziahziah cihzong ong gen lai hi.

Senator McConnel hongtung ciangin, mi thu dong nuam kitam ahihman in, ken huntam kangahkei a , dotna 3 kadong theihi. Amasa in kawlgam pan pai Zomi khat kahihna leh, ZNC member Pu Cin Sian Thang mi kahihna kakipulak masa a, anuai a bang in dotna kabawl hi.

 1. Kawlmi pongpong leh kawlkumpite pen tuni dong ciang, ko namtawm mualtungmite tung ah, agenbang un ong gamta lo uh ahihman un, kamuang zokei uh hi. nang leh senator pa muhna ah no ko dinmun ah ding hi le uh cin na muang ngam uh diam?

Dawnna- Tuatawh kisai in kawlkumpi ten, namtawm minamte nengniam mahmah cih pen, ko muhna ban ah tu mahmah inzong, lotdaw ( Parliament) ah 75% bang amau hi cih pen kimuthei hi. A hizongin tun muhtheih pah ding in, namtawm thautawite tawh kilemna la uh hi,  adiak in,  KNU bang tawh alamdangtak in kilemna lata, thongkiate khahta , namtawm tangmite tawh vaihawm khawmta ban ah, Suu Kyi bang zong kiteelna lut ding, alutna ding mun zong Karen mite atam ten mahmahna pan a, tangmi a dinsawm himawk ahihman in, kei hileeng pilvaang kawmsa in muangning ci in nui peepaa sa in ongdawng hi.

 2. Kawl kumpite in Sanction tawh kisai in, US in ahong mengmeng nanga  ngetna tawh kisai in, kei muhna ah kumpite in amau sumbawl sumzonnate,  a tangzai zawkna ding, galkap kumpi thuneihna akip semsem na ding,  ngimna hizaw ding in kamu-a,  no na bangci muh uh hiam?

Dawnna- Tuatawh kisai pen, sumbawl sumzuakna tawh kisai in, athunei pi bel, Sente na hi in, tu a nang muhdan pian leh Sente holhthawhna zong tamsim hiding hiven, Kawl ulian ka kimuhpih khempeuh un, Sanction vai ngetpi in ong nei uh hi. A hizong in pilvaangtak a ki encikding a, kolam pan ngetnate asep abawlna uh tungtawn bek in,  kikhiam pan ding a kikangkang hi ung in, olno tak in kikhah lo ding hi ci hi.

 3. Suu Kyi pen kiteelna ah ong lut toto in, mipi sanna leh gualzawhna ong ngah taktak leh, zalen tak a vaihawm khuan nei taktakding in na um hiam?

Dawnna- Tuatawh kisai in 1990 kum kiteelna bang enleng, thuneihna bukim kipialo suak hi. Ahizongin tutung  leuleu ciangin, galkap ki ukna beita in,  Democracy tawh akalsuan sawm kumpi tawh, nasem ding ahihmanin, zalen taka vaihawm theihna nei ding in ka lamen hi. Ong tung ding April kha a kalhalh kiteel ding bang zong, suakta zalen tak leh thumaan tak hiding ci-in, Thein Sein in gen a kiteel commission te zong gamdang  pan sittel theihna kipia ding ci'n hong  gen ci hi.

 Mikangte khat in " Tu'n Kawlgam bang hong hoih ding hita cileeng,  Democratic System mantak in, ong kalsuan hi leh, hih ongtai sa refugee te na puakkik uh diam? ci a adot leh, tua vai tawh kisai in geelna omkei, pawlkhat lah ciah veve in teh, pawlkhat lah kum tamta inteh, pawlkhat lah gammi suak inteh, pawlkhat lah sangkah laklawh inteh, dawnhak,  thei lian keng ci hi.

 Thang Khawm Pau Zomi
 ZomiDaily' Writer
1009 Bryant Way Apt B,
 Bowling green,
Ky42103 Cell- 270 -9019388

 ( Pu Thang Khawm Pau pen Pu Cin Sian Thang leh Zomi National Congress supporter khat ahihi. Tulai tak World Zomi Congress ah Incharge, Department of Human Resource alet laitak ahihi.)