Sagawh lamsang kiam ahihmanin, 2011 sangin 2012 sungah, bawngsa leh aksa man khang dinga, mantam zaw ding hi ci in, United States Department of Agriculture in pulak ci in Seminole Chronicle website ah Febuary 15, 2012 dendeuh in kigelh hi.
Tua website kigelhna ah USDA report in , 2011 sangin gan kitawm gawh zaw ahihmanin, 2012 sung sa man khanglawh ding ci hi. Gankhoina lam ah khangtohna a om hangin, upmawh sangin sasanh tung, atung tawm zaw ci hi.
Ahihhangin saman bangzah taktak ah khang ding cih bel genkholh hamsa hi, banghang hiam cih leh US leh leitung sumbawlna koitan hong hoihkik ding cih thu leh, gamdang pan sa bangzah ki lalut ding cih ah, tampi kinga ding hi ci in, tua report ah kigelh hi.
Alamdang bilbel khat ah bel aktui, bawngnawi, cheese leh nawinel ( butter) man bel kiam zek ding ci hi. Aktui pen 1.03 pan 1.10 kikal ah kia kha thei ding ci hi. Sai-ak leuleu bel kumlang ciang khangkhang to dingin, tua khit ciang kiamkik ding ci hi.
" Sa man akhang mah bangin i nitha beek hong khang leh hoih ding hi, meat industry ah sasemh te mah kitaawl penpen hi." ci in Zomi sasemh khat ahi Pa Sian in amuh daan gen hi.
Tulai tak Sa Sumbawlna (Meat Industry) ah Zomi tampi in citak leh kuhkal takin nasem uh a, Zomi leh Zogam kivakna lian mahmah khat ahihi.
No comments:
Post a Comment