Zanhal CT Scan hih khit ciangin, tuni Colonoscopy kici gilzangpi sung ah pipe thun a, gilsung teng camera tawh etna hih leuleu. Sunglam etna himhim pen Endoscopy ci uh a, tua lak ah gilzangpi etna pen Colonoscopy ci uh na hihi.
Sun 12 pawl a kipan ding hi in, ahih hangin preregister bawl khol leh, thawlpi kha khol ding ci in, 11 khonga hong tung khol sak uh hi.
Hih Colonoscopy hih ma ni khat zan ni in , gilsung teng hahsiangna ding ci in, Miralex leh zatang nam dang khat hong nesak uh a, asawtlo in, sung hong pai zuahzuah hi, pailua kisa i sungkua teng bang tawh paikhia khawm leh kilawm phialmawk hi.
Zanni pen bang mah nelo in, sung tholhsak ziahziah khit ciangin, zan 12 pan bang mah neilo dawn theilo ding ci uh a, tuni zato pai ciang bang gil lah kial, thalah bei in kihawi pian phial ahihi.
Zato tu'n ciangin hong vel ding doctor pa emergency om ci in, nai khat hong ngaksak beh uh hi. Tua khit ciangin, room khat ah leng tawh hong sawn dede in, tua mun ah khau honpi khat hong thuah uh hi. I awm a belh tawh, khut a thuah tawh hi bialbial keei hi. Tua khit ciang i nak ah oxygen pipe hong thuah in, ban pan zatui hong sun uh a, tua khit zawh khua kiphawk nawnlo hi.
A ihmu kisa a ka khanlawh leh, room dang khat na hi leuleu in, nurse nu ka dot leh manta hong ci in, innlamte zong hong dawn ding na phone khin ta uh hi.
Zatui nam khat hong prescribe (gelhsak) uh a, bang hiam ci a ka dot leh, natdona( Pain Relief/ Pain Medicine) zatui na hi in, nai 8 ciang tang khat ta nek ding ahihi.
Amasa ki-at lai a natdona hong piakte uh pen nai 4 tang nih ta bung khat, tua bei ciang nai 4 tang khat bung khat ahihi. Tua zatuite pen narcotic/beng khamtheih vive kihel hi in, ei thu a kilei theilo in, doctor lai bek tawh kilei thei hi.
Anung ciangin nai 4 khatveita nek ding mah hong pia uh in, numei nausuah leh ki-at cianga apiakte uh hi in, khauhlualo hi.
Tua zatui abei ciangin ki-atna maa ana zong hong phatuamin, taak leh thak seuhseuh zawzen a, tuakawmin hong dam ziau hi.
Tuni colonoscopy hong bawl zawh leuleu ciangin, natdona pen atuam dang khat hong pia leuleu in, zong khauh lua nawnlo hi.
Ni bangzah kal bangzah aphak ciangin koitan dam ding cih pen, atheikhol uh na hi in, siam mahmah uh cih ding ahihi.
Inn tu'n ciang Tedim niangtui haipi khat ka dawn khit ciang ka ihmut vingveng leh nuam peuhmah hi.
Nitak lam ciang unau Zotung innkuan te'n sa sungkua meh hong kholh in, gilmultho lianga ka nek khit ciang, ka hek hong nuam zawdeuh in, hih blog post kong gelh ahihi.
Cidamna zong awlmawh ciat ni.
2 comments:
Na gengenna pan ahi zong, Aizawla u Rova tungtang pan ahi zong, ka om a nop ngei melloh tawh kei zong nung Fri ni Dr. Kant zuan,Rs 200/- hong la, tawm bilbel. Zatui Rs 65/- man khat lei ding leh Janta X-Ray Clinic ah nam 13 ki-check dingin hong refer. Lunghimawh simsim.
Janta ah nitaakin va pai, zun hong laksak khitteh Chest X-ray hong zaih. Tua khit ECG (computerized) kici khut leh khe teng ah kol hong bulh, ka awm teng khaugui tawh hong kimatsak zeizai mai.
A zingsang teh gilhawmsa-in pai, sisan hong laksak, sisan pen nam 8 khawngin ki-test dan. Tua khit USG Whole Abdomen ci-in Ultrasound tawh gil teng hong check. Tua teng pen Rs. 6830/- man hi. En tul 2/3 khawng ding sa.
A nitak teh result va la, Dr Kant kiang paipih, pumpi sungah thau (oil) tam lua cihloh adangte normal cih theih hi mai; athau lam (oil) leh sa neek melloh ding, salad tam neek ding leh lampai hahkat in, zatui kisam kei hong ci ziau. Sum 7000/- tak bei hangin natna hoihlo dang nei lo phial ka hihna ka theihna ahih manin lung hong nuamsak a, meet ka sa lel hi.
Ka pumpi sunga oil lam tam luat mana Triglyceride leh Cholesterol sanna pen 2010 kuma ka theih khitsa hi. Tua hi a, mihing pen
1. I cidamna ki-chek zel kul hi
2. Athau lam leh sasial lam tam neek loh ding hi.
3. Theigah leh meh sialneek theihte pawl tam neek kul hi.
4. Thamaan luat hoihlo hi.
cih teng hong kup beh nuam hi ing. - JPau
Triglyceride leh Cholesterol tam leh zunkhum leh sikhang kinei kici aman hia?
Post a Comment