Tulai Rule of Law cih Thein Sein te pawl in mipi leh leitung ah hong zuak keei uh in, apawtham enleng hoih mahmah napi in, asung thu taktak ngaihsun leng nak lauhuai mahmah hi.
Gam khat peuhpeuh akhangto leh kilemna a om theih nangin rule of law kici, daannuai a miteng bittak a om kisam mah ahihi.
Ahihhangin tulai a Thein Sein tepawl hongzuak uh rule of law acih uh pen, 2008 Constitution nuai ah miteng lukun a, tua daan in mi khempeuh hong uk ( rule) ding acihna uh ahihi.
Aung San Suu Kyi tawh akiho zawh uh, Aung San Suu Kyi in zong tuamah cih pih in, nungdeuh a hong hawh British Prime Minister David Cameron in zong, thu telcian lo pi in Rule of Law poimawh hi cihpih pong hi.
Tutunga Rule of Law kici Thein Sein te hong thaangkam sung ah i lut khak a leh,
1. 2008 Constitution of Union of Myanmar ah Galkap pawl khat bek om ding ci ahihmanin, tua Kawltegalkap pawl bek om dinga Shan, Kachin, Karen leh Zomi Galkapte phiat mang kul ding cihna ahihi. Tuabang hileh Kawllo minamte hong kihtak ding uh bei dinga, tua a kipan adeihdeih vua hong talkaih ding uh ahihi.
2. Rule of Law acih uh pen 2008 Constitution thumang ding acihna uh himawk ahihmanin, tua 2008 constitution thumang ding hi leng KIO, KNU, SSPP a kipan kawllo kipawlnate political party ah kikhel kul dinga, tua kikhel zawh, political party law te'n gaakcip ding ahihmanin, bangmah semzo lo in damdam in bei ding uh ahihi.
Tua ahihmanin 2008 Constitution pen mipi leh Zomi, Kachin, Shan, Karen leh kawllo minamte deihna tawh kituak a kipuah masak phot kei a leh, Rule of Law cih paulap hoihpi zang a, Kawlgalkap te cih bangbang manga, va kipiakkhiat khak hetloh ding thupi hi.
Tulai a kihona nei kipawlnate'n Union Level kihona pann, Democracy taktak leh Federal System taktak a pai ding, Thein Sein te kiang pan a kician kithukimna hong ngahkhiat zawh kei vua leh, 2008 Constitution nuai ah va ki baptise masak khak hetloh ding hi.
A zenzen a kamciam leh kithukimna kician omlopi a Mualgam kipawlna mungpite hong ki baptise vua leh, Parliament pan Constitution nungpuah ding cih pen, a thu ahoih hangin atak ah baih hetlo ding hi.
Adiakin Kawllo state 7 tenga MP teng kigawm leng zong, Myanmarian Parliament ah alang (half) zong kipha zolo ahihmanin, Parliament tawn a puah ding cih pen thu hi theilo hi.
2008 Constitution puah theih nang pen MP seh 4 suah seh 3 in a thukim kul ci ahihmanin, Kawl USDP leh NLD tamzawkna Myanmarian Parliament i mitkha ah koih leng kimu khol thei hi.
Tua ahihmanin tulai a hong kizuak Rule of Law kici pen bumleh mengmeng ding kisam ahihi.
Rule of Law acihna vuah bang Law pentak hi ding hiam cih sittel hun ahihi.
No comments:
Post a Comment