Thein Sein Roadmap UNFC in thukkik

Source

www.panglong.org

WZC

ZIA

KIO, SSPP, KNU, KNPP, CNF, MNSP, KKO leh mualgam kipawlna lianpite kikhaikhawmna United Nationalities Federal Council-UNFC in April 19, 2012 ni  Press Conference abawlna uh ah, Thein Sein Roadmap pen UNFC in pom nailo uh ahihlam  pulak  hi.

Tua Press Conference bawlna ah " Mualgam galkap te'n hiamkham ceasefire a kibawl ciat hangin, Thein Sein sialsa lampi akip akawi a zuih sawm pah cihna hilo hi." ci in UNFC pawllutanghuh Pu David Thakapaw in gen hi.

Photo: www.panglong.org

Hih Press Conference ah UNFC pawl 11 lak ah  Palaung te leh CNF losiah, member  khempeuh kihel uh cih kiza hi.

" Mualgam Kipawlna te'n Party phuan a kiteelna lut ding cih pen, nidanglai a thului hi a tu'n ahih leh UNFC in parliament ( Hluttaw) sung pan kikhelna piangzo dingin ka um nawn kei uh hi." ci in Mon makai Pu Nai Hongsa in zong gen hi.

March 1, 2012 a Thein Sein i State of The Union thumuutna ah, mualgam galkap kipawlna te'n,

1. Myanmar Huaisia gam pan cikmah hun a inntuan lo ding.
2. Doh Tawun Ayay 3 Par kici Kawlgalkapte ultungna thu meilet thum pompih ding.
3. Development semkhawm ding.( Kuaman Kawlte Development Deih Nawnlo)
4. Tuazawh ciang KNU, KIO NMSP leh pawl tuamtuam te'n Party phuan a kiteelna lut ding.

Cih thu teng mualgam te tungah Thein Sein in ngiat a, tua Kawlngian pen Thein Sein Roadmap kici ahihi.

UNFC in zong Thein Sein Roadmap dawngkikna in UNFC Roadmap khat pulak kik a tuate,

1. Kawlte palai Aung Min tawh kiho masa phot ding.
2. UNFC palai leh Kawl palai te'n political dialoque kici gamthu geelkhawmna panpah ding.
3. Tua khit ciang UNFC pawl lutlo mualgam kipawlnate kihel a Mualgam Khawmpi khat bawl ding.
4. Tua mualgam khawmpi khit ciangin Kawlte kihelin, Belpawl Gambup Khawmpi khat bawl ding.
5. Tua belpawl gambup khawmpi pan a thu khensat bangbang atak a sepkhiat ding.

Ci in UNFC in Roadmap khat tawh thukkik uh hi.

Hih tawh kisai Zomi te pansan bang hiam cih thu  akikan ciangin, tu a UNFC thuthang  hong taksuah ding a leh bel, Zomi te policy tawh hong kinai zawdeuh ta ahihmanin ,  UNFC member zong Zomi te ki-ut thei pan kha ding ci in, WZC leh ZIA lamte muhdaan om cih kiza ahihi.

UNFC pen mualgam kipawlna 11 tawh kibawl hi in,  UWSA, MNDAA,   RCSS leh ZIA cih bang mualgam kipawlna hat tampi UNFC member lutlo omlai ahihi.