Thuthang kizakna ah Sino-Burma kikawmna lian pen ahi Mandalay- Muse Highway pi June 01, 2012 ni a kipanin. nitak pan zingsang kikal zanhun sung teng Kachin Independence Army in khaktan ding ci in motor neite thu zasak cih kiza hi.
Kachin News ah kigelhna ah Myanmarian Galkap te'n civil mipi motor ah uniform silhlo in tuang uh a, Kachin galkapte bukapvat ( supprise attack) bawl thei zel uh a, tua bukapvatabawl theihnawnlo nang uh ngimna tawh kikham ci hi.
Kachin Independence Army VCS Brigg. Gum Maw in " Hih thu pen phualpi pan thu kipia hilo a, tua khawk akem KIA Brigade No.4 te'n ahun leh amun zui a kisam asak bang vua lai asuah uh hi." ci hi.
May 22, 2012 ni a suak Myanmar Alin Newspaper ah, KIA in May 19 ni in Mandalay-Muse Highway a vanpua truck 2 susia ci in kigelh hi. Hih thu tawh kisai KIA Brigade No.4 a officer khat in, civil motor 2 te'n Kawlgalkapte pualo dinga thu apiak uh manglo uh ahihman a susia ci in gen hi.
Tulaitak Kachin galkap te'n Myitkyina- Kanbaiti lampi, Mantong- Namtu lampi, Myitkyina-Bamaw lampi teng khaktancip uh a, tu'n Mandalay- Muse lampi zansung khaktan sawm leuleu uh ahihi.
Tua ahihmanin tulian in China tawh kikawmna lampi atamzaw kikhaktan cih theih hi a, Myanmar-China sumbawlna zong kiamsuk kha thei hi. Myanmar-China sumbawlna pen nungkumin USD awn 5000 val pha in, tualak ah 3000 val pen gamgi sumbawlna ( border trade) pan ahihi.
China tawh sumbawl a zin Zomi te pilvanghuai hi.
No comments:
Post a Comment