Zomi leh Karen sung buaina

                                

Myanmarian Sang-Ak Palai Aung Min leh KNLA CS Mutto Saypho in Office hongna nei.

                                  
 Tulai tak Kawl te'n Karen sung a buai theihtheih nang tokgawp ta uh ahihi. Rakhine khit ciang, Zomi leh Chin State sung hong tawkgawp uh a, lawhcing kisa in  tu'n Karen sung buhteikawi tawh tawk kipan ta uh ahihi.

1. Amasa in DKBA sung tokgawp uh a KKO/DKBA  kimlai pen, KKO atuam DKBA atuam ding daanin hawlthoh uh hi. DKBA makai Saw La Pwe in Mualgam khawmpi kah ding KKO President leh General Secretary pen gamdang mi ( Australian leh American Citizen) ahihmanun  ka khawlsak hi ci in thusuah hi. Karen sungah thu kigenna ah Political Wing KKO leh DKBA khenkham nanga, Myanmarian te'n nasem hi dinga   ummawh uh hi. KKO makai Mann Robert Zan in bel US Citizen cih hong theih pi mah vua, kum 2 sung beek hong huh in ci a hong cial man vua ka panpih hi zaw hi. Hong tawpsak vanglak uh leh, themvei ( Temporary) cih bang hi kei henla, atawntung ci in, hong tawpsak vet uh hen ci hi.
2. Tunai in KNU Pha-ann Liaison Office hon ding tawh kisai,  KNU Headquaters leh KNLA kikal hong buai leuleu uh a, Pha-ann Office hon ding pen KNU phualpi hilh lo in, KNLA Commander teng amau thu in, va pai ngeingai uh a, Myanmar Sang-Ak palai Aung Min tawh September 29, 2012 ni in hong khawm uh hi. Hih tawh kisai KNU Headquaters in theih pih kei ung ci in lai suah uh hi. KNLA pen KNU Department pi 14 lak a khat ahi Karen National Defence Department-KNDD nuai a department khat  hi ci uh hi.

Kawl Suu Kyi leh Thein Sein pangkhawmin, leitung ah Burmese Way To Democracy alawhcing nangin, nakpi in panla uh a, bangmah theician tumteng mello, leitung gam khenkhat te'n agal panin Kawlgam Democracy ngah taktak ta sak lawh uh hi.

 

Tua dinmun metbawl in  RUM ( Republic of Union of Myanmar) huamsung,  leitang alang val  leh leisung leipua hauhna atamzaw pianna Mualgam teng, Myanmar  Colony nuai ah  a koih suak theih nang vua, nakpi pan hong la uh ahihi.

Karen mipi leh intellectual te'n Myanmar tawh ceasefire neih  sangin,  nei keileng kimeet zaw ci ngeingai ta uh hi.

Political Dialoque taktak neih ding pen Kawlte lau mahmah uh a, tua hanga Karen leh Mualgam sung teng thuneihna, sum, numei, zu a kipan makai leh lubiik te duhduh tawh zol a, hong khen khamkham ta uh ahihi.

Non Burman State 7 teng lawngkhat kisuah a Federal thului ding pen, Kawlte alau penpen uh ahihmanin, Rakhine ah Buddhist leh Muslim, Kachin ah Kachin leh Tailai, Shan gam ah Shan leh Wa, Karen sungah Christian leh Buddhist banah Political Wing leh Arm Wingte kikal senhnen sawm uh ahihi.

Bangterng hi leh Zomi leh Mualgamte a nennen abekbek a i om zong, khat leh khat i tut hun khat hong tung  ( Khaliik kuan khong) ciang,  i kikap i kibuai zongin, Neipi Taw Khawmpi ah Right To Self-determination leh Equality mah i gen tek ding hong thupi ding hi. Tua khawmpi thukhensat pen Myanmarian Colonial Parliament in pom tuanlo dinga, ahizongin, leitung ah nidang ciang Mualgamte dikzaw hang ci a, kisiamta'n ( Justify) theihna ding thubulpi khat hong suak ding ahihi. Leitungin thu khat peuh pen kua dikzaw cih pan en zaw hi.

Hi thei leh 2015 kiteel khit ciang, i deih i duh sung pan leng hoih zaw ahihi. Kawl te'n hong pumvak uh hi tuanlo ahih ciang, ki tuulmoh duldul luat nang omlo ahihi. Aki tul mawh duldul te pen amau party, pawl leh mimal hamphat nang khong lel hi in, gambup nambup vai ahihloh lam theih ding hoih hi.