Zomi US Top 10 Jobs 2012

2012 kum a dinga nasep hoih leh sumlut tam a kigente pen, avek phialin  Cidamnalam ( Healthcare)  leh Siamna ( Technology) lam vive ahihi.

Hih silbawlna industry nam 2 te'n mithak limlak penpen, nasemte lungkim sakzo penpen leh nitha leh khasum sang piak zo pen uh ci hi.

Nasep tangpi nam 2 in kikhen a White Colar Job ( Hakkol Kang) leh Blue Colar Jobs (Hakkol Duum) ahihi. Hakkol Kang cih ciangin, laikung tawh nasepmna zawdeuh hi in, Hakkol Dumm cih ciangin thatang tawh nasepnate ahihi. Zomi te hakol pen kawl te'n Chin Collar hong cihsak uh a, Zomite Collar pen dawm hetlo ahihlam , i theihsak nopna tawh hakkol cih kizang ahihi.

Tua Top 10 nasep kicite anuai bang ahihi. Kum khat sumlut zah pen a laihawl ( Median Salary) alak uh ahihi. Sum tuat daan pen US Dollar tawh ahihi.

White Collar Hakkol Kang Nasepte:

1. Registered Nurse (RM). $ 64,690/kum.
2. Software Developer. $ 87,790/kum.
3. Pharmacist. $ 111,570/kum.
4. Medical Assistant. 28,860/kum.
5. Database Administrator. 73,490/kum.
6. Occupational Therapist. 72,320/kum
7. Web Developer. 75,660/kum
8. Computer Systems Analyst. 77,760/kum
9. Physical Therapist. 76310/kum. 
10. Computer Programmer. 71,380/kum

Blue Collar Hakkol Duum Nasepte:

1. Construction and Building Inspector. $ 43,670/kum.
2. Plumber, Pipe Fitter and Steam Fitter. $ 23.86/dak, $ 42,432/kum.
3. Structural iron and steel worker. $ 20.40/dak, $ 42,432/kum
4. Electrician. $ 20.33, $ 42286/kum.
5. Elevator Installer. 28.23/dak, 58,718/kum.
6. Police Officer. 23.70/dak, 45,210/kum.
7. Subway or streetcar operator. 23.70/dak, 49,296/kum
8. Commercial and industrial equipment electrical and electronic repairer. 20.48/dak, 42,598/kum.
9. Aircraft and avionnics mechanic . 21.77/dak, 45,281/kum.
10. .Plastic machine setter. 21.28/dak, 44,262/kum.

Zomi te'n zong tu a i septe pen, i tu'ncil thumangna peuh leh nektawm ding peuh a i sep pak hi henla, mailam ah bel hih top 10 nasepte i ngah zawh nangin, lampi zongin gentheihna kulhpi phukham ding hi hang.

Atunga nasep hoihte i ngah zawh nangin lampi 3 om ahihi. Tuate:

• GED kanteh kan ding. GED pen gal ngaihsun a kihtak ding hilo in. Asial in khatvei exam guap suk lecin, na kiat zenzen hangin, na upmawh sang  baih sazaw ding cin a, tha ngah san in GED kah nuam pan ding na hihi. Tualo a mi na dotdot leh na lungkia malam ding hi. Exam man 50 khongbek hi in na lualo hi. Sin kilkello in Exam masa phot inla tua khit ciang kah pan in.
• GED i kah nop kei aleh, Kawlgam leh India hiam pan Degree leh Certificate te zanga, Colledge leh University leh Training School te a va zom ding. Myanmahni Myanmahhan tawh cihna hi.
• Khangthakte lam lah ding. Ei Burma product pawl bel sang khong ki gimneih pian, kikihta pian pong in, i kah nop kei leh zong khangno sangkah laite , lamlak leh kawkmuh ding cihna hi.

Zomi te'n atunga nasep hoihte i sin theih nangin, White Collar nasepte ahih leh Tan 8 tan, Blue Collar nasepte a dingin tan 4 na sin ngei leh, kisuanglo takin zuizo ding na hihi. Zomi na hih leh cihna ahihi. Kawlte banga kalar lai zang minamte bang peuhmah bel, BA,MA, Ph.D ahi phial uh zongin, apau uh naungek pau banga mawl mokmok in, mi te'n apau uh thei zo mahmah loin buai uh ahihi. Zomi te bel ABC zangzangte i hihmanin,  i pau theih sunsun mi te'n tel mahmah bilbel in, tua pen i hamphatna ahihlam phawk ciat ni.

Zomi te kidem pih pen Chin, Kuki leh Mizo cih peuh hilo hi. Myanmar Kawlte nangawn kidempih a i neih leh, amau nuai ah ki om den ding hi. Kidempih khempeuh zogai ding cih omlo ahihmanin,  Zomi te kidem pih ding pen Singapore, Switzeland, Iceland, Luxemburg, Croatia cih khong hi zaw ahihi. Singapore leh Iceland khong kidem pih a, i lelh leh zong na sak luat nang om vangvang khol loin, i kidem pih man a hamphatna tam zawsop ding hi.

Nunglam a i gelh Sing Pu leh Nin Pu  cih tepawl pen Silbawlna Business hi a, tu a i gente pen nasepna (Jobs) tawh kisai ahihi.

Takkheh Zomi !

 I omom na ciat ah,  i mai a kulhpi khempeuh phukham ciat ding hihang. 

Zomi GDP khangsak ni.

Ref:

www.careerbuilder.com

www.money.usnews.com

www.careercast.com
www.forbes.com