DKBA Day leh Zomi

Photo:KIC

Democratic Karen Benevolent Army kiphuh zawh kum 18 ci'nna pawipi, Karen gam Myawaddy township sung, Sonesee Myaing phualpi ah december 21, 2012 ni in thupi leh nopci takin  kibawl cih kiza hi.

Hungeelna pen zingsang nai 7 in kipan a, DKBA makai Senior General Saw La Pwe in military parade column 10 te  kiang pan zahtak piakna tawh hun ki hong a , tua khit ciangin Myangyingu Siampupa leh DKBA political wing ahi Kaloo-htoo-baw Karen Organization-KKO pawllutang huh Pu Mosi in thugenna leh hanthawnna pia  ci hi.

General Saw La Pwe in KKO/DKBA pen Karen minam bek hilo in, mualmi khempeuh a ding nasem kipawlna hi in, mailam ah zong tuabang mah in dingto lai ding  ci in gen hi.

Tua banah DKBA Tactical Commander Brigg. Kyaw Thet in " DKBA pen Kawl kumpi bek hilo in, kipawlna dang khenkhat in zong abei leh asiat nangin panlala om hi. Ahihhangin gam leh nam a dinga nasepnate khawl tuanlo a kizom toto lai ding hi." ci in gen hi.

Politics tawh kisai Col. San Aung in " Politics ah bel phualpi KNU policy zui in ka kalsuan ding uh hi." ci in KIC News te kiang ah gen  hi.

Tutung DKBA kumci'n pawipi ah Shan, Rakhine, Kayah, KNU/KNLA, NLD leh Yangon pan Pu Nay Myo Zin va kihel thei in,  mipi bel 4000 val in uap uh ci hi.

Zomi te zong pawisiim dingin hong cial uh a, Zomi Independence Army palaite va kihel thei cih kiza hi . Zolam zong lunggulh uh ahihmanin, ZOMUS te zong Zo ngeina leh lam lak dingin WZC in request a, ahihhangin ahun toi lua banah,  lungdambawl hun leh siamsinte sang kihong kik hun ahihmanin,  a mi ding lem pak thei lo a,  Zo ngeina leh lamte va kilak theilo cih kiza hi.