Zomi Computer Programmer

Nasep hoih 10 lak ah Web Developer leh Software Developer thu i gelh khin hi. Tutunga i gelh kik nop pen Computer Programmer thu ahihi.

Computer Programmer te naseppi pen software program  gelh ahihi. Software cih pen program  abombom a kikhil ahihi. Tua program i cihte pen programming language cih omin, tua language te siksan a kigelh ci hi. Gentehna in C, C++, Python leh Java cih bangte pen computer pau kici in, tua paute zanga program kigelh ci hi. Gentehna in Zolai i theihnop leh ABC i theih kul, Laipian lai tawh lai i gelh nop leh Laipian Script i theih kul cihna hi. Computer Language ah C++ leh Python kinak zat penpen ci hi.

Computer Programmer khat in software gelh leh zuun thuah uh ci hi. Tua banah sin, puah leh keem uh ci hi.

Leitunga minthang Ubuntu Linux Operating System ahawmkhia, Canonical Company a Software Engineer Barry Warsaw in Programmer nasep zia nam 2 om  ci hi.  " Programmer khenkhat pen asawt ciangin vaihawmna management lam ah  zakhang thei uh a, tua hun ciangin software gelhgelh cih om nawnlo in, vaihawm bek mah si  uh ." ci hi. Adang khat leuleu pen programming lam ah makai suakto thei uh ci in, free software leh Open-source lam a kum 30 val asem Barry Warsaw in gen hi.

Lungsim dai tak a om siam ding, ihmu cim sak ding, ann limtak ne ding ban ah, lungsim cidam sak den ding kisam ci hi. Nasep zawh ciang computer ah tutu lai lo a, computer nusiat zawh ding kisam ci lai hi. Innkuan pihte tawh hun zangkhawm zel ding, ahih kei leh na pumpi battery di'm kik zel ding ci hi. Hun sawtpi lungsim kigak (Persistance long term stress) in na om leh, atawpna ciang suukkangh bang ding hi teh ci in, Computer Programming lunglutte Pu Bal Sawm ( Barry Warsaw) in deihsak thu gen hi.

2010-20 sungin Computer Programmer nasep 12%  khang dinga, programmer 43,700 kisam ding ci in, Bureau of Labor Statistics-BLS in tuat khol ci hi. Hih nasep pen 2012 bek hilo in, 2013 dong top 10 ah kihel to lai ding ci hi.

Siamman( Salary)

Kum khat in: 

Asangpen 10% te'n USD. 115,610.

Aniampen 10% te'n USD.   41,710.

Ahuampi   75% te'n USD.   92,510.

Alaihawl pawl   te'n  USD.  72,630.

Ahuampi   25% te'n USD.   54850.

Siamman tam kipiakna khawkte:

Rochester metropolitan areas, Minn.

San Jose, California.

Durham, North Carolina.

Siamsinna 

( Trainning )

Atangpi in programmer te a dingin bachelor degree khat kisam ci hi. Ahihhangin mun post khenkhat a dingin kum 2 degree le certificate zong kicing lel ci hi. Programmer khenkhat te'n information systems, computer science leh mathmatics cih bang degree te nei uh ci hi. Tua ban ah company lian te'n a nasemte uh siamsinna lam ah panpih leh sinsak thei uh ci hi. 

Velkikna leh ngaihsut piakna 

( Reviews and Advice)

Programming nasep pen hi bilbial ( perversive), namtam zeizai (diverse) leh theihtuam kul (specialized) mahmah nasemna khat ci in Warsaw in ngaihsun hi.

' Programming ah language teltuam leh siamtuam na neih kul kha ding hi, ahihhangin akisapna dungzui a na theih ngei kilkel loh, technology khat tawh hong kisawl leh zong, na sep ngam veve kul hi.' ci in, Warsaw in programming tawh kisai gen hi.

' Gentehna in front end kici web development lam bang nasep leh visual design, testing leh java script lam na khoih theih ding kisam hi.' ci hi. Tua banah back end nasep lam ahih leh SQL ( database), multi processing experience leh computer pau ahi C, C++, Python, Perl, Java leh Ruby paute theih kul ci hi.

Programming ah poimawh mahmah napi, mite awlmawh khak loh thu 2 om ci hi. Tuate:

1. Sinnopna leh sinzawhna kisam ( Ability to learn )
2. Lawm leh gual tawh sepkhawm bawlkhawm siamna. ( Ability to collaborate.)

Technology khangtohna pen manlang lua ahihmanin, kisinna pen atawntung kisam den ci in, software engineer kum 30 val semta Pu Warsaw in gen hi.

Pu Warsaw in a thukhupna ah 'Tuni a siam na kisak mahmah language pen, zingciang kizang nawnlo kikeuh thei hi. Tua banah  'Room mial sunga khatguak softare gelh sim khakhauh kici pen, phuahtawmthu ( myth) hi ding hi.' ci in gen hi.

Computer Programmer lawhcing khat suak theih nangin " Leitungbup a programmer te tawh, nisim a thu kihawm a, semkhawm pangkhawm liailiai ding pen a thupi penpen hi."ci hi.



Zomi Computer Programmer

Zomi Computer Programmer 1000 khong, Web Developer 1000 khong, Software Developer 1000 khong leh ZIA 1000 khong nei zo leng,  a ban bel pasian in zong hong huh nuam zaw deuh dingin i lam-en hi.

Gelhsate anuai a link mek in ki en kik thei hi.

Top 10 nasep
Zomi Softaware Developer
Zomi Web Developer


Programming Language na bawltawm nop leh aci khat zong om hi. Anuai ah link i koih hi.

Click Here!