Kawl Gal

                                             

                               
Tusawngteng Kawlgal tawh kisai thupiang khenkhat ciamtehna anuai bang ahihi.

1. Palaung Autonomous Region ah kikapna nasia takin om kik cih kiza hi. Palaung mipi te'n Kawlte piak Palaung Autonomous Region  deihlo in, Ta-anng National Libration Front- TNLF cih phuankik uh a,  KIA leh SSA tawh pang khawmin, Kawlgal nangkhawm ta uh ahihi. Nidang in Palaung te'n Palaung State Libration Army-PSLA cih minam galkap nei ngei uh hi. 2008 Constitution akigelh ciangin Palaung Autonomous Region cih khat pia uh hi. Ahihhangin tu'n kum 4 khong hong sawt ciangin, tua PAR in thuneihna bangmah neilo ahihlam hong mukhia ta uh in, TNLF phuankik a Kawlgal dokik uh ahihi. December 13, 2012 ni in TNLF leh USDP te Shan State Kutkai township sunga Kawlte Opium field ah kikap in, Kawl 2 si in 3 liam ci  hi.  Palaung Autonomous Region ah Pyituhsit homeguard leh Myanmar Army kipawlin, opium leh khamtheih tuamtuam cing uh a, TNLF leh KIA in tua kham theih dodal abawl uh pen,  Myanmar Army,  ceasefire leh Pyituhsit te'n zadah uh cih kiza hi.
2. Tulaitakin KIA phualpi Laiza khawpi kiim ah kikapna nasia takin om cih kiza hi.KIA leh ABSDF pang khawmin, alang khat ah Myanmar Army leh Kachin ceasefire pawl NDA-K leh Kachin nam neuneu  pyituhsitte pangkhawm cih kiza hi.
3. Tulai mah in UWSA Wa makaite China Innpi People's Congress ah vakah uh a, tua thu azak ciangun, Myanmar Gamkeek kumpi patau in, President Office minister Aung Min (khutlam-en)  Wagam hawhsakin kho uh a, Wagam khangtoh nang Kawlsum Ks.4,000,000,000 ( billion 4) kamciam pah hi.  Myanmar Parliament ah Wa State ka ngen ding uh ci in,  aung Min zin khit ciangin, UWSA thusuak zong hong om  pah hi. 2008 constitution gelh lai in Wa te'n State a ngen uh, Kawl te'n pia nuamlo in Autonomous Division bek pia uh a, Wa te lungkimlo uh ahihi.
4. Tapong tawh kizom ci a mipite Myanmar in amat ahen niloh lai ding leh, President Office minister Aung Min zong mat ding ahihi ci in, Shan State Army-SSA makai Brigg. Pau Khen in, Kengtung a Shan Lai leh Ngeina Seminar ah gen ci hi. Banghang hiam cih leh Aung Min in SSA leh mipi kizopna ah mipite kawl galkap in amat ahen uh leh, kei mahmah zong hong kiman hen ci in July 22, 2012 ni in Shan makaite kiangah  gen ngei hi.
5. December 7-9 kikal CNF leh USDP kumpi kihona nei uh a, ngetna 31 aneih lak vuah athupilo 27 kithukim thei in, athupi 4 te kikum ngamlo in dingkhawl uh hi. Federal vai khat zong kithukimna ngah zolo uh hi. Tuta abat leh CNF zong NDA-K, KDA,KPNLO, MDA leh PSLA bangin, damdamin Myanmar Gamkeek te'n valhtum leh kilawm hi. 
6. Tulai in ZIA in mithak kai khawmkhawm lai ci in kiza hi. 2015 khit cianga nasia tak a hong om ding  mualgam-kawlgam final kidopi a dingin, kigingkholhna nakpi in nei san laitak uh hi ci in kiza hi.
7. Leitunga gam 20 kiang bek a zuakkhuan kipia, Sweden bawl M 3 Carl Gustaf Rocket Launcher khat, KIA in Myanmar camp khat aluhkhiatna pan ngah kha uh hi. Tua thu Sweden Journalist khat in Sweden gam Newspaper ah gelh a, tua kipan Sweden kumpi buai hi. A Serial number akan uh ciangin, Sweden in India te azuak lak a te na hihi. Tu'n Sweden in India te a thusit lai tak ahihi. Carl Gustaf Rocket Launcher pen , Sweden in gam 20 bek zuak a, tua lak ah Myanmar kihello ahihi. Tua gam 20 te'n zong zuaksawn khuan neilo uh ahihi. India kalar officer khat in bel, Myanmar te kiangah sih theihna galhiam khat zong ka zuak ngei kei uh hi ci in, December 15 ni in PTI news te kiangah gen hi. Carl Gustaf pen India leh  puaisar gam khat ahi Singapore in zong zuak hi dinga ki ummawh hi. Mualgam camp pite akiatna ahang tamzaw pen Carl Gustaf hang kihel ahihi. Sweden in gam 20 te hong check leh, Kawl te'n apiakkik ding uh kul ahihmanin, beidong lawh mahmah ding uh ahihi. EU in 1996 a kipan Kawlte galvan zuakkhuan kham ahihi.
8. Tukha sung mah in Shan State Army in Kawlte gal-anntah Shan Pyituhsitte khut sung panin, khamtheih guihtheih tampi mankhia in, tuateng China kumpi ap ci hi.
9. Kachin-Myanmar kikapna ah KIA 260 si in 2000 liam ta ci hi. Myanmar Army bel a si bekbek 10,000 val ta ci in kiza hi. KIA in guerrilla warfare zangin, Myanmar Army g te'n khamtheih Yaba, Kanza leh Army Rum  suang in nawtgawp uh ahihmanin a si tam uh ci hi.

                                             

                                              Myanmar barbarian galkapte photo tuamtuam.

                              

                              

                              

                              

                              

                              

                   

                             

                                    


                                       

                           

Kachin gam a si kawl officer photo.