KIA in lehsim ta

Kachin gam Pangwar kikapna ah KIA in ado anang bek hi nawnlo in, lehsim ( Counter Offensive/ Tanpian Htoosit) kik zota ci in, KIA spokeperson Pu Lang Nang in December 10, 2012 ni in PNA news te kiangah  gen hi.

 "Amasa in Tactical Commander ( Byuhahmu) khat makaih in hong kuan uh a,  asi aliam tawh hong lel uh ahihmanin, Division Commander ( Tatmahhmu) khat makaih in hong sim leuleu uh hi. Tua zong hong zo tuanlo uh ahihmanin, tu'n Northern Command a Commander Bo Tun Tun Naung ( Myaukpai Tai-hmu) mahmah hong kuan liang ta hi." ci in, KIA tangkopu Lang Nang in PNA  news te kiangah  Demcember 10, 2012 ni in gen hi.

December 10, 2012 zingsang 9:45 in zong, Myanmar Airforce in Russia bawl MI.24 helicopter zangin, Air-to-surface kici  van-pan-lei kapna rocket te tawh KIA te kap uh ci hi.

December 01 a kipan Myanmar Army in Pangwar Offensive pan uh a, ahihhangin asi leh liam tampi tawh lawhsam uh ahihmanin, Tactical Commander pa tu'n galkap thukhenzum ( Military Tribunal/ Sit-khone-yone)  tu'n uh cih kiza hi.

December 04 ni kipan No.88 Light Infantry Division ( Tatmah 88) commander pa makaih in, Myanmar Airforce huhna tawh akuan kik uh hangin lel lai veve uh hi. 

December 08, 2012 ni a kipan Northern Commander Tun Tun Naung makaih in kuan leuleu uh a, tu'n nisim phial in Zosuan Kachin galkapte leh kawlgalkapte nakpi in  Pangwar ah kikap  uh cih kiza hi.

December 10, 2012 ciangin Myanmar Army te lawhsam leuleu in,  KIA in lehsim kik zo ta cih kiza hi.

Zomi galsiam khat in agenna ah , tu'n khawkeu hun hong kipan ta ahihmanin, April-March kha guahtui kiat masiah, nakpi a kikapna hong om ding ahihi ci in gen hi.

KIA in kum 17 sung Myanmar tawh ceasefire aneih uh hangin, Panglong siksan a Federal Union bawl ding, Kawlte utlo uh ahihmanin 2011 June kha in Kawl te'n Kachin gam  simkik uh a, tua a kipan tuni tan kikapna kizom suak ahihi.

KIA in 2015 kiteelna khit cianga hong kah thak, kumpi te'n kilemna a deih taktak uh leh, tua hun khong ciang politics genkhawm nuam pan ung ci in gen uh hi. 2008 Constitution nuai ah KIA cikmah hunin lut ngeilo ding ci uh hi.

Pangwar kikapna ah Regional Commander makaih nangawnin asim uh hangin zolo uh ahihmanin, Min Aung Hlaing leh Thein Sein mahmah akuan uh kul phial leh kilawm ta ahihi.

Tulaitak UNO in Kachin mipite huh theih nang ahanciam laitak ahihi. Myanmar kumpi in huhkhuan pianuamlo ahihmanin, UNO in lampi dang azo'n laitak ahihi. Myanmar in anial teitei leh, Bosnia a UNO in mipite UN galkap zanga, nek le dawn apuak ngei bang dinmun zong hong tung  thei khamawhlo hi.

Kachin mipi bup in suahtak nangin anntang thungetna nei thei zel uh a, pasian bil atung leh bel, alamdang phial khat in, KIA in gualzawhna homg ngah toto thei ahihi.

Kawl te'n khakhat sungin KIA kakapbei ding uh acih uh pen, tuni tan kum khat valta in zo tuanlo uh a, China te'n KIA huh uh hi cipong uh hi.

Kachin te'n bel ko kuamah muanga ding hi kei ung, kuaman zong hong huh beek kei, a hihhang in Kachinte hong ompih tawntung khat  bel om hi." ci in dawng ziau uh hi.

Pasian deihna tawh kituak a, KIA in ma hong sawn tohtoh theih a leh bel, Zomite zong diang ziahziah ding hi hang ci in, Zomi khangno tampi in WZC te kiangah min khum  ngeingai uh cih kiza hi.