Zomi Software Developer

2010 kumin Software Developer:

75% in kum khat 109,210

25% in kum khat   69,090

Median Wage        87,790 

Thalawh uh ci hi.

Zomi leh Zogam suahtak taktak zawh nang ciang ding pen, tu a i dinmun lingliangte tawh, hong hi zo pah samlo ding ahihi. Khenkhat bangin atuat ngial uh ciangin, suahtak nang bekbek in zong, USD billion a bei ding ci in tuat khia uh hi. Tuabang ahihzawh nangin, Zomi te'n nasep hoih leh  silbawlna hoih tampi, i mat   zawh nang kisam hi.

Zomi te resource neih pen mihing  hi phot ahihmanin, human resource lam kidomkang ding bek mah lampi  om sunsun  suak hi. Kawlmang leh Vaimangte zia ngakngak tawh, kiallap lo ding ahihmanin, ei leh ei lampi i zon ding kisam ahihi. Political Freedom i kisam mah bangin, Financial Freedom zong kisam i hihi.

Nunglamin Nasep Hoih Nam 10 thu i taklang khin a, tua lak ah Web Developer thu zong aza ngeilo kikeuh leh, kawllai manglai thei napi, Zolai mah tawh a sim nuam tanghtangh te  a ding ci in i gelh khin hi.

Tutungin Software Developer thu i luikhia nuam leuleu hi. Mun khenkhat ah Software Developer kici in, khenkhat ah Software Engineer  ci uh hi.

Ahuampi ( Overview)

Atangpi in software developer te'n design bawl, lamkhia (Construct), software sin ( Test) leh software kem ( maintain) uh ci hi. Developer khat in amahguak in zong nasem kha thei a, atangpi in bel director, supervisor cih bang khat nuai ah midangte tawh sem khawm liailiai uh ci  hi. 

Software Code gelh pen hih nasep i elguhpi  hi a, ahihhangin developer khat in software sinna leh tua software  limtak leh mamtak a kizang theih nang a kemna zong kihel ci hi. Software Developer nasep pen silbawlna namkim ah kisam in, kumpi leh private sector tuamtuam ah nasep om ci uh hi.

Beauro of Labor and Statistics te tuatna ah 2010-20  sungin, US bekbek ah Softaware Developer/Engineer 143,800 kisam ding ci hi. Leitunbup tawh tuat leng mi a awn a simin  kisam ding cihna ahihi. Nasep mun awng ding atam ban ah, nasemte lungkimna zong  sang mahmah ahihmanin, 2012 nasep hoih 10 lak ah software developer nasep in  2 na la zo ahihi.

Siamman ( Salary)

2010 kumin software developer te'n kum khat in anauia bangin siamman sang uh ci hi.

• Alaihawl pawl in kum khat   87,790 kiim.
• Asang ngah pen 10% ten   133,110 kiim.
• Aniam pen lam te'n               54,360 kiim.

Thaman tamna khawkte:

• El Centro, California.
• Haverhill-North Endover-Amesbury areas of Massachusetts and New Hampshire.

Tua banah Metal and Mineral  Merchant Wholesellers lam te'n, thaman tampiak zawh penpen uh ci hi.

Siamsinna ( Training)

Software Developer nasem dingte,  kumpi leh silbawl te'n asap uh ciangin, Bachelor Degree kisam ci thei zel uh hi. Ahihhangin Degree na neihloh hangin , na siam a leh entry level pan zong kipan thei lel ci uh hi.

Degree nei ahi zongin, kisintawm ahizongin, technogy i cih pen a minute, anai, ani phial a khangkhang, athak piangpiang leh kibeh laplap ahihmanin, nasep kawm mah a sin tohtoh veve kul ci hi. Tua ahihmanin a uuk leh lunglut taktak hih ding thupi zaw a, siamna pilna tawh kisai lumghihmawh huai lua lawmlawm lo ci hi.

Atangpi in nasepna (employer) te'n kisina leh kisinbehna trainingte nei hamtangin, tua pan zong kizom toto thei ci uh hi.

San Francisco a cloud computing company khat ahi Joyent Company a vice president ban ah, software engineer te sim dinga kibawl, ACM Queu Magazine a thudotpi khat ahi Bryan Cantrill in " Tulai in software engineer kisam zah pen colledge, university leh siamsina tuamtuam pan suakkhia zolo hi." ci in gen hi. 

Industry silbawlna dang tuamtuam te ah, nasemmite khiamkhiam leh mithak akilak mello a,  nasep ding atawm mahmah hangin, Software Developer te leuleu a dingin bel, nasep nang mun awng tam mahmah a, company te kituh keei liang uh ci hi.

Software Engineer semnuam te'n community colledge te ah  Computer Science kisin thei a, tua pan kum 4 course te zong azom nuam te'n zom suak thei ci hi. 

Zomi leh Software Developing.

Zomite atamlua zong i hi zokei zongin Software Developer 1000 leh Web Developer 1000 khong om zo leng, Zogam suahtakna zong kal 2000 khong hong nai tuam  ding ahihi.

Software Engineering sin ding cih khong pen, abaih zong hisamlo in, mikim kivakna zong hituan samlo ding hi. 

Ahihhangin Zomi  software developer khatin agenna ah " Software Developing sin bel baih kei veve ei, ahihhangin nasep silbawl kawmkal ah, hun om sunsun ah practice zel leng bel, kithei toto lel hi. Zomi khuak bel na dawi tuan hetlo hi."  ci hi.

Ciamnuih zong tawh athuah thei pian Zomi Software Guruno khat in zong " Tulai in gamkhangtote ah Zomi kitam mahmah ta in, innkuan neite bel thu khat hi in, khangthak leh  single te'n   hong hanciam leh deihsak mahmah ing, hun-awl cianga puanza nuai a sik-lukhu nuainuai peuh , zu dawndawn peuh , hik kideh saksak peuh, muklawk zen a mi gen siasia peuh,   parcel buai a buai niloh peuh, leh mizi mita kua ka khum zo diam?  cih peuh tawh, hun i bei saksak sangin, Software Developer lam khong  lunglut henhan leng  deihhuai  zaw hi."  ci in, Zomi Software Developer ciamnuih hat khat in amuh daan  gen hi.

Bangteng hi leh Zomi Software Developer tampi hong piangkhiat ding hun i ngaklah hi.