Zomi Web Developer

Nunglam a US Top 10 Jobs 2012 kici,  2012 a dinga nasep hoih penpen 10 te i gen khin hi. Zomite USA ah kitam pen phot ahihman a kigelh phot ahihi.

Tua nasep 10 te lak a 6 na ahi Web Developer nasep tawh kisai hihmun ah gencian ding hi hang.

Tulai in Web Developer te i khasum kigawm pen kum khat in anuai a zah bang ngah uh ahihi.

1. Asang ngah pawl 75%  in USD.97,660 kum khat , kha khat 8000 kiim.
2. Alaihawl pawl                  USD. 75,660, kha khat 6000 kiim.
3. 25% aniamlam te'n           USD. 57240, kha khat 4000 val.
4. Job Satisfaction                High 

Cih bangin thaman sangin, nasep ah lungkimna zong sang mahmah   ci hi. 

Ahuampi Enna (Overview)

Web Developer te nasep pi pen, nasep cialte deihna bangbang bawl sak theih ding leh, a website te uh etlawm leh zatnuam mahmah a bawl sak theih ding kisam ci hi. Tua banah web developer khat in website i products ahih kei leh service pen, azangte leh asimte lunglut theihtheih dinga zep leh zolsiam ding kisam ci hi.

Web Developer khat in Software Programs, Web Applications leh Programming Language ahi HTML cihte pawl theih ding kisam ban ah, Design Principals te zong theih kul ci hi.

Web Developer te nasepna pen Corporation lianpi te, Kumpi leh silbawlna nono te ( small businesses) tan huam ci hi.Tuate website bawlsak, kepsak, zuun sak nasep ahihi. Full time , part time leh contract a zong sep theih ci hi.

Bureau of Labor and Statistics te genna ah 2010-20 sungin nasep mun 21.7 % kibehlap ding ci hi. Web Developer 65,700 kisam ding cihna ahihi.

Thaman ( Salary)

Bureau of Labor and Statistics in a gen zomna ah 2010 kumin, web developer 10% in kum khat in 119,940 thalawh uh a, aniam pen te'n 43,190 thalawh uh ci hi.

Thaman sang piazo silbawlnate pen:

• Architectural and structural metals manufacturing industry.
• Rail transport industry.
• Semi conductor manufacturing industry.

A khua leh amun et in anuai a metropolitan area lam ah nitha tam ci hi.

•  California a San Jose leh San Francisco khawk.
•  Trenton-Ewing, N.J.

Siamsinna (Training)

Web Developer nasep hoih ngah theih nangin, atangpi in Computer tawh kisai degree khat peuh nei leng hoih ci uh hi. Gentehna in Compouter science leh Information Technology degree khat peuh cihna ahihi.

Degree  na nei kei zongin siam taktak thei taktak lecin zong nasep om veve ci uh hi. Web Developer nasep pen, heiga suih, vokkuang suih daan mah a, khut siamna nam khat ahihmanin, degree ngah a siam hetlo a om mah bangin, degree leh certificate neilo a siam mahmah zong om ci hi. Akisam taktak pen  technical skills leh practical experience  ci uh hi.

Bangteng ahizongin Web Developer ut khat in. anuai a certificate te beek nei leh hoih ci hi.

• Certified Web Developer-CWP
• Certified Internet Webmaster-CIW
• Advance Web Developer.

Tua banah web developer na ut taktak leh, Mobile Application development zong thei lecin, limci mahmah ci uh hi.

Webgrrls International a CEO ahi Pi Nelly Yusupova in  " Degree leh certifications te sangin experience kisam zaw hi." ci in gen hi.

Tua banah university leh colledge  te pan nasin ahizongin, nang leh nang kisin tawm na hi zongin, phamawhlo hi. Athupi pen nasiamlam na lahkhiat theih ding kisam  zaw ci hi.

Web Developer nasep ngazawh nang lampite

Web Developer lawhcing khat suak theih nang leh nasep hoih ngah theih nanga lampi hoih penpen bel, mite tawh ki zopna networking hanciam mahmah kul ci uh hi. Mi te'n na siam lam hong theih kei uh leh nasep hong ciallo ding uh hi. Tua ahihmanin nasiamna lim zuak khiat mahmah in ci uh hi.

Zomi leh Web Development

Tulai gam khangtote ah zomi tampi kitung ta hi. Ahihhangin adiakin khangno pilna nei tampi tak, pilna tawh kituak nasep kingahlo in, general labor in kileng phengphang hi. Tua i dinmun pan  kidomkang toh nangin, kal khat i suan kul lai ahihi.

Tua lak ah web developer nasep zong, Zomite a ding hoih mahmah khat ahi cih lahnopna tawh,  thu kaihkhawm teng kiluikhia ahihi.

Zomi Web Developer khat in agenna ah " Aizawl ah nuntak zongna in sawtpi tak siamgan in ka om ngei a, tua tawh teh in bel, web developer nasep pen azah 100 phial in baih sa zaw ing." ci hi.

Web cih ciangin maimom bu cihna hi in, website bawl pen khenkhat in siamgan tawh teh uh hi.

Zomi khangno tangzang leh pilna maban nei lai  te'n, Cyber khuapi  ah mombu hong gan ngeingai dih un ci in, i ki hanthawn nuam ahihi.

Tua hi leh i Zogam pi zong hong nai zawdeuh ding ahihi.