Pilna bulphuh nasep silbawlnate gamdangte sepsakna pen Outsourcing kici a, thatang bulphuh nasepsilbawlte gamdangte sepsakna pen Offshoring kici hi. Outsourcing ah India kinak zat mahmah a, Offshoring ah China kilimzat mahmah hi.
Kum 2000-2009 kikal sung bekbek in US nasep awn 6 val gamdang ah kikhinkhia a, tua pen nasep omzah i 1/3 phazo ci hi. Tuabanga nasep omsunte gamdangah kikhinkhin ( Offshoring) napi, 2011 a kipan nasep kikhin kiamkik a US gamsungah nasep ( Manufacturing jobs/setzone nasep) thak 500,000 kibehlap ta ci hi.
Nitha leh vanbawlman tawmzaw ahihmanin US a setzone neite gamdang ah kikhin uh a, tua mun pan van tawmcik bei in bawl uh a, US leh leitungah amet tampi tawh zuak kik zel uh hi. Gentehna in iPhone pen US a kiphuak hinapi China ah kibawl sese hi. Tua panin US ah man tampipi in zuakkik in met mahmah uh ci hi.
Tulaitakin China ah iPhone, Laptop leh Playstation bawlna a sem bekbek 1,500,000 kiim pha uh in nasemmite kha-tha USD 300 vallo ci hi.
Ahihhangin tuhun ciangin China leh Asia gamte ah zong thacialman khang tektek banah, namgim leh gas man zong khangkhang ahihmanin vanbawl man sang mahmah ta ci hi.
Tua bang dinmun ahihmanin US company tampite'n innphual bulphuh in vanbawl kik sawm ta uh ahihmanin nasep hong tamkik kha thei ding ci in kigen hi. Gentehna khat ah sumbuk minthang Wal-Mart in zong hong pai ding kum 10 sungin, US khawtual a kibawl van Billion 50 man zong khia ding ci in kiza hi.
Tuabang kawmkal ah,
Asia ah nasep kipuakpuak akicih hangin Zogam in aphatuampih lam kiza kha nailo ahihmanin, US leh gamkhangtote a nasepte innlam ciahkik ( Reshore) le uh, Zomi te'n hoh i phattuam pih zaw nam maw? cih dotna khat hong om bilbel hi.
1988-2013 tan Myanmar ah gamdang pan sumbul hong kizang USD 44,000,000,000 val phata hi. Ahihhangin Zogam ah a lut omlo hi. Alut om sunsun Gullu Nickel guuk nanga ki invest hi sawnsawn hi.
 |
| Smartphone Factory. Photo courtesy: Macleans, Canada. |
No comments:
Post a Comment