US ah Asian Store bangci hong ding ( Part 1)

Asia pan a gampeem leh hong teng atamna mun khatpeuh ah na teng aleh Asian Store hong lecin nuntakkhom cing silbawlna khat a neizo suak ding na hihi. Tua bek hilo in nang khom a hau theihna zong om ding ahihi.

Hibang dinmun ah sumbuk hong nuam na hih leh anuai thute ngahsut kholh ding kisam ahihi.

1. Asian sumbuk hong ding na hih leh amau Asian mite i agam vua zatzat ngei uh vante ngaihsut masak ding ahihi. Tua vante pen US stote te ah a kingah mengmenglote hi leh hoih zaw kan lai hi.
2. Tua amau innlam a azatzat uh vante veve lak ah ann leh tui tawh kisai ngaihsut masak huai ahihi. Banghang hiam cih leh annnek tuidawn pen nisim a zatloh phamawh khat ahihban ah, nek le dawn daan pen ngeina khel pakpak ding baihlo ahihmanin a market hing tawntung ahihi.
3. Sumbuk na hong ding ciangin a mun ding tuat khol in. Asian mite omna veng laizang, amaute nasep paina lampi dung leh amaute hawhmun paimunna munte hoih ahihi. Tua bang mun hoih teel masa in.
4. Tuabang mun hoih na teel khit ciangin kumpi kiangah kancian masa phot in. banghang hiam cih leh khau pawlkhat leh mun pawl khat pen grocery zuakna mun ding in kiphalo thei hi.
5. Amun vai hong siang ciangin na City Office ah pai inla US federal, state, county, city leh na tualsung ah sumbuk hongna tawh kisai kumpi thukhun leh daante na theih nang dongcian kancian ding kisam leuleu hi. Nektheih zuak ding na hih leh US ah thukhun khauh mahmah ahihlam zong na phawk leh na theih ding kisam hi.
6. Kumpi thukhunte na theih khit ciangin siah piak daan leh nasemmite tawh kisai vai pai daan limtak sin inla telsawm mahmah in.
7. Kumpilamte kiangah kan a kakankhit ciangin na vanzat kisam dingte kancian kaikhawm ding kisam hi. Van zuakna ah adiak in  sumset(cash register), Vuukkuang( refrigerators), Tuikhalbawm(freezers), Vandawh ( display racks), Vantau (shelves), lawh leh kuang( bins) kisam hamtang cih theikhol in.
8. Vanzat ding teng na kaihkhop khit ciangin bang zuak ding, koi pan la ding ( gamsung gampua) cih tuatpah in.
9. A tunga teng na tuat nasep khit ciangin sumbul bangzah tawh kipan ding cih geel in, tua khit ciangin hun ciangtan sung a bangzah sumlut ding a bangzah sum pusuak ding cih tuat khol in.
10. Sumbul, sumbei leh sumlut zah ding na tuat khit ciangin, koi ah sumnaak om thei ding hiam cih kankhia in. gentehna financing, grant, loan cih bang.
11. Atawpna ah atung a 1-10 teng pen gual dieudeu in la Business Plan khat gelhkhia ding na hihi.                                                                                                                                                                      

Silbawl Geelna (Business Plan) na neih cian khit ciang in:

•  Sumbul na neih kei leh na business plan lak in la na bank a kipan bul tuamtuam pan sumbul ngah sawm inla sumlam kikhamuang in.
• Sumbul or sumnaak hong om khit ciangin sumbuk mun ding innsapna (lease agreement), vanbawl (manufacturers), vanponghpiak (wholesaler), vanhawm ( distributers) te tawh kithukimna (contracts) bawl in.
• Tuabang a vai teng na kiging phitphet khit ciangin kumpi kiang pan phalna (permit) leh zattheihna (licence) ngen ding na hihi.  
• Atunga teng pen  a lo theilo kisam peelmawh khuammung leh kalbite ahihi. Tua banah nangguak in zolo thei ding na hihmanin nasem zong na cial kul kha ding ahihi. Sumbuk sung leh vanzuakte  puah, kem, siansuah leh thaksuah sak zel ding zong kisam zel ahihmanin tua a ding zong kigingkhol dending na hihi.

Hibang a na kiging kholhnate tungah na kilungmuang taktak ciangin vante vaikhak inla, na sumbuk ah van kitasam lo in gen den ding na hihi. Na sumbuk a van koih ding tawh kisai ngaihsutna nuamtuam dingin anuai ah them i gual hi. 

• Singah
• Mehteh
• Tuipi ann (Seafood)
• Logah lonah (Herbs)
• Athak
• A um
• Thuthangbu
• Limhing (Movies)
• Bel leh annhuanna
• Kuang le keu
• Phone card
• Atunga teng pen Asian store tangpi ah zong om ding ahihmanin, store dangte a kingahlo van nam tuamtuam kanbeh lai inla koih sawm hamtang ding na hihi.
• Zomi tamna mun a nahong leh Zomite duh theih, deihtheih leh zatnop diakte zong koih ding mangngilh kei in.

Na khua, na veng, na kiang ah hiam Asian store dang khat na kidem pih ding a om leh , nang sumbuk pen pen a kilamdangna diak khat aom nangin hanciam in. Gentehna in na nektheih zuakte thaksuah leh hingzaw hamtang cih.

Atung a teng pen US a Asian store kipannuamte Zomi mipih sapihte a dingngimna tawh a kigelh ahihi. Alunglut taktak te'n a tung a idea teng banah a hoih nono ngaihsun a behlap ciat ding ahihi.

Topa thupha