Pu Pau L Dal in tulai Kawlgam a ABFSU te lungphona tawh kisai ama muh daan hong gen leh ngaihsut huai leh sep huai khat om ahihi.
Ama hong kuppihna ah tulai a Kawlgalkapte bawl hun leh nite tawh kituak nawnlo, Education Law langpangna ah Zomi laisiangtho sangnaupangte zong kihelhuai hilo hiam ci hi.
Banghanghiam cih leh Zomi leh christian laisiangtho sangte zong kumpi in hong theihpih/recognize a accredited school hi thei leh, laisiangtho sang mante zong kumpi theih pih hi ding a, nasep silbawlna ah zong nuamtuam phatuam ding cih ahihi.
Tua ahihmanin Zomi leh christian laisiangtho sangnaupang te'n zong laisiangtho degree leh sangte kumpi in hong theihpih nang in ABFSU lungphona ah va kihel huai hilo hiam cih ahihi.
Hih thu tawh kisai kei muhna ah zong kinak hel huai mahmah hi. banghang hiam cih leh leitung gam khangtote ah laisiangtho degree zong secular degree te mah bangin kizang thei a, nasep silbawlnate ah degree dangte tawh kikimin ki pomsak hi. University leh colledge tampi ah laisiangtho zong major khat in kisin sak hi.
Laisiangtho sangkah pen biakna nasem ding cih hipah tuanlo a, nasep tuamtuam ah laisiangtho sang zo te kihel leh society zong hoih tuam zaw kanlai ding ahihi. Tua zong pasian nasepna taktak khat mah hi zaw lai ahihi.
Zomite dinmun bang enleng a diakin a beisa kum 30 sung in Laisiangtho sangkah pen khalam bek hilo leitung nuntakna leh khawmuhna ah i lampi hong honsak leh hong sialsak khat ahihi.
Tua ahihmanin Zomi laisiangtho sangnaupang te in laisiangtho degree leh laisiangtho sangte kumpi in hong theihpih pompih nang in tangko lungpho huai ka sa hi.
Tua hi leh Zomi tampi maban kihong bek thamlo in, Zomite laisiangtho sangte zong sang kician leh muanhuai hong suak toto ding ahihi.
Takkhek masuan ve ni.
Nang bang ci'n na mu a leh sanggam?
No comments:
Post a Comment