Tulai kawlmangte bawl sawm, kiteelna tawh kisai, Zomi sungah a deihlo pawl, deihpih a mi zolzol pawl ( leitungbup a tangkopih bang zong om) tawh om zengzung i hihi.
Hih mun ah i gennop a hih leh 2010 Kawlmang kiteelna thu hilo zaw in, tua zawh ciang bangteng hong piang thei ding cih ahihi.
2010 Kawlmang kiteelna zawh ciang in, hong piang ding a upmawh huai thu khenklhat anuai abang ahihi.
1. 1990 kiteelna result in Kawlgalkap kumpi pen leitungah migilo kumpi ahihlam dawksak niloh ahihi. Tua result thahna in 2010 kiteelna pan hong bawltawm uh USDP kumpi zang ding uh ahihi. Tua USDP kumpi pen leitungah ban zuak kawikawi ding uh hi. Tua kawmkal ah NLD pen amuih tum taktak nang final singkhuah tawh vatlup hong sawm ding uh ahihi. Tua tawh kiton in mipi teel mualmi party teng zong vuisa hong hi ding ahihi.
2. SPDC pen USDP mipi kumpi daan in hong kineih ta ding ahihmanin, Zogam le mualgam teng pen, valhtum theih nang, nasemna official in hong pan ta ding uh ahihi. Tu nangawn in zong, Kachingam Hukong Valley ah kawlgam pan kawlte nawnnawn in, tengsak ta uh ahihi. Tua bang nasepnate pen USDP kumpi hun ciang dalzawhloh in hong sem zuah zuah ta ding uh ahihi. Zomi leh Mualgamte in i kiko pih hang Mipiteel kumpi nasep ahi, hong cihsan lel ding uh ahihi. Keuhbek Party ( Phony Opposition) kici 2008 thukhun pom party thakte in hanghang ding uh a, ahizong in atawpna ah pauzong paungamnawnlo in abanban in hong mitmit ding uh ahihi.
3. Mualmi state teng ah Kawl kumpi nasem tampi hong khah ding uh a, kawlgalkap te'n back up ding uh ahihmanin, kua man khoih ngamlo in, hong maingal mahmah ding uh ahihi. Thuneihna teng labei ding uh a, thuneite maimuh nang ci in, pitek putek nangawn Kawlpau a kisin uh hong kul ding ahihi. Kawlpau theilote pen mihai hong suak ding uh a, society pualam ah maineu tak in om ding uh ahihi.
4. Buddhist siampu tampi kawlmang sponsor na tawh hong kuan in, zung hong khawh ding uh ahihi. Official hita ahihmanin, daan tawh kidaal zolo dinga, gilkial dangtak Zomite donghu hong suak ding uh hi , tua siksan in Zomi Christian tampi Buddhist ah hamsatna hang in hong lut ding uh ahihi. Hamphatna khempeuh Buddhist biakna tawh hong mekmat ding uh a,Tua pan in Zogambup biakna ah hong valhtum ding uh hi ta ahihi.
5. Thuneihna le Biakna ah hong valhtum khit ciang in, Zogam leitang teng pen project tuamtuam paulam in, Kawl companyte hong zuak ding uh a, Company khat in mualdung lianpipi agriculture khong paulap in dai hong kai ding ahihi.
6. thuneihna, biakna le leitang ah hong valhtum khit ciang un, Zogam a piang Zosuan teng le asuan akhak teng un tawntung a Zogam hong lutkik theihloh nang, Law hong bawl ding uh ahihi.
Atunga teng pen kum 20 sung bang a hong tangtu'n zo ziau ding uh a, Zomite minam vakvai khat in leitung ah i kivial lehleh kul thei kha ding ahihi.
Ahizong pasian in amah bia minam khat mangthang le vakvai a om dingin awilo ding ahi, cih pen Zomite kihehnemna om sun ahihi.
No comments:
Post a Comment