September 4, 2011 ni in thuthak kizakna ah, Kachin Independence Army in kidalna ( Defensive) bek a migilo Kawlgalkapte athuk kikna uh pan in, Kawlte kap ding ngak phot lo a, alemna munmun, alem hunhun a galmakhelh a buluh kawikawina ( Offensive) panta uh ci in kiza hi.
August 21-26 kikal Nam San Yang kikapna ah Kawl galkap 30 si in Kawlte thau 16 luak kha uh ci hi.
Zanni September 03,2011 ni in KIA Khalahyah 3 te'n , Waimaw Township sung Shwe Nyaungpin a kibusa Kawl Penglam Galkapte vabuluh uh a, Kawl galkap 4 si in 7 liam uh ci in report kiza hi.
Abeisa hunsung KIA in amau le amau kidalna bekin Kawlte kapkik uh a, June 30, 2011 a kihokikna vuah kithukimna om theilo a kipan, KIA in gam le lei hunkhiat nangin lampi om khempeuh pan thukkik ta kici hi.
June kha Kawl le Kachin kihona ah KIA in,
1. Kachin bek tawh hilo a Zogam, Karengam, Shangam, Mongam, Kayahgam, Rakhinegam te tawh zong hiamkham (ceasefire) bawl ding.
2. Mualgam kipawlna UNFC min tawh kiho ding.
3. Panglong le belpawlgam tawh kisai Kawlgalkapte lungsim pulak ding.
Cih thu 3 teng ngiat uh hi. Ahizongin Kawlgalkap/USDP regime in mualmi teng khenkham a, amalmal a kiho pih sawm banah, 2008 Pingpei Constitution thukhun nuai ah lut sak nuam in thangkam uh ahihmanin kithukimna ngah zolo uh hi.
Mitampi genna ah Kachin galkap regular 8000 val pha in, anungthuap (reserve/pyithusit) 20000 val nei uh hi, ci in kiza hi. Tua banah thaubawlna zong neita uh ci in kiza hi. Kawlgalkaplam bel galvan le thauvui thautang kicing mahmah kici hi, ahihhang in Kawlgalkap pen guta,khutdawh ngen, inntai le zawhthawh thu tawh akaihkhawm uh mi bongsong teng ahihmanin, Pyinmanar Hausate lungkham mahmah uh hihtuak hi. Tua ban ah Kawlgalkap 400,000 kiim lak ah 70000 val pen kumcinglo naupang galkap hi, ci in Human Rights Wacth- HRW report ah kigelh hi.
Zomi thuthei upa khenkhat in " Kawlkhang abei dekdek ta hi" ci uh hi.
No comments:
Post a Comment