ZOMI Vs MORA

Ministry of Religious Affairs-MORA kisamlo hi.

Kawlgam ah ministry of religious affairs/ Thatanayay Wungyi Thanah ci in Biakna Vuangyi thanah khat koih tawntung pong uh hi.

MORA te nasep abeisa teng enkik leng:

Zogam leh mualgam teng pen Taungtan Thatana Pyuh Aphuaih ci in MORA nuai ah branch khat koih uh a, MORA in sum kisam bangbang sik uh hi.

Zogam sunga Tedim, Falam leh Mindat a Buddhist monastry teng pen nidang pek pan huhna pia uh ahihi. Anungciang in Chin State leh Zomite tengna mun khempeuh ah Buddhist te nasepna khempeuh panpih uh hi.

MORA cih pen Christian, Islam, Hindu, Buddhist, Lawki leh Laipian a kipan, khentuam kuamah neilo a angvan ding ahihi.

Ahihhangin Myanmar MORA in Buddhist bek ultung leh langgup uh a, Myanmar gambup a christian, muslim, hindu leh biakna dangte hamsatna tuak khempeuh pen, pangpih cih genloh asungthu ah MORA khut ma tampi kihel zawsop lai ahihi.

Tunai June 19-23-25 sungin MORA sung buaina nasia tak om in, MORA minister Hsan Sint jail ah kikhum ban ah Director General lui Ant Maung zong jail sung tungta cih kiza hi. Hsan Sint mun ah Lakh 8000 golhguk ne ci a kingawh Su Win in len ta hi.

Zogam a singlamteh kiphuuk teng pen Than Shwe leh Ant Maung khutma ahihi.

Leitung gam khangto leh suakta tamzaw ah Minsitry of Religious Affairs cih peuhmah koi gam mah ah omlo hi.

Tua ahihmanin phattuamna hong pialo Myanmarian Ministry of Religious Affairs-MORA pen phiatbei ding leh, tua nuai a Missionary Work in Border and Hilly Regions kici zong phiat siang ding cih pen Zomi te deihna khat ahihi.

Tulaitak in MORA nuai a Missionary Work in Border and Hilly Regions-MWBR in Budhist missionary centre 457 neita uh a, Buddhist monks 537 leh Buddhist nuns 41 nei ta uh hi. Buddhist ah mi 144054 lutsak khin ta uh ahihi.

MORA pen World Zomi Congress, Zomi Independence Army leh Zomi te'n ki deihlo hi.